حیدرآباد: ڈپٹی چیف منسٹر بھٹی وکرمارکا نے پیر کے روز تلنگانہ میں منعقدہ Caste Censusکو سماجی انصاف کی سمت ایک جرات مندانہ اقدام قرار دیا۔ انہوں نے کہا کہ چیف منسٹر ریونت ریڈی کی قیادت میں یہ پہل تلنگانہ کو اصلاحات کا قومی نمونہ بنا رہی ہے۔
بھٹی وکرمارکا رویندرا بھارتی میں منعقدہ سردار سروائی پاپنا جینتی تقریب سے خطاب کر رہے تھے۔ انہوں نے کہا کہ تلنگانہ پہلا ریاست ہے جس نے ریاست گیر سطح پر ذات پات مردم شماری مکمل کی اور اس کی بنیاد پر حکومت نے پسماندہ طبقات کے لئے تعلیم، ملازمتوں اور مقامی اداروں میں 42 فیصد تحفظات کی منظوری دی۔
انہوں نے بتایا کہ اسمبلی نے اس قرارداد کو متفقہ طور پر منظور کرتے ہوئے گورنر کو روانہ کردیا ہے۔ بھٹی نے کہا کہ اس فیصلے نے قومی سطح پر بحث چھیڑ دی ہے اور مرکزی حکومت پر بھی دباؤ ڈالا ہے کہ وہ اسی طرز کی پہل پر غور کرے۔ انہوں نے بہوجن برادریوں سے اپیل کی کہ وہ اس کامیابی کے بارے میں شعور اجاگر کریں اور عوامی حکومت کے تحت حاصل شدہ فوائد کی حفاظت کریں۔
ڈپٹی چیف منسٹر نے اعلان کیا کہ سیکریٹریٹ کے سامنے سردار سروائی پاپنا کا مجسمہ نصب کیا جائے گا۔ انہوں نے کہا کہ یہ اقدام پاپنا کی وراثت کو خراج عقیدت اور انصاف و مساوات کی علامت ہوگا۔ بھٹی نے چیف منسٹر کا شکریہ ادا کیا کہ انہوں نے اس منصوبہ کے لئے جگہ فراہم کی اور منظوری دی۔
انہوں نے یاد دلایا کہ پاپنا نے اس دور میں مختلف طبقات کو متحد کیا جب سماجی عدم مساوات عروج پر تھی۔ بھٹی نے کہا کہ یہی اتحاد اور مزاحمت کی روح آج کی حکمرانی کے لئے رہنما ہونی چاہئے۔
انہوں نے خبردار کیا کہ بعض سیاسی جماعتیں تحفظات کی پالیسی کے بارے میں غلط فہمیاں پھیلا رہی ہیں۔ حکومت کے موقف کو دہراتے ہوئے انہوں نے کہا کہ تلنگانہ پسماندہ طبقات کے حقوق کے تحفظ کے لئے پُرعزم ہے۔ انہوں نے عوام سے اپیل کی کہ وہ متحد رہیں اور فتنہ انگیز پروپیگنڈے کو مسترد کریں۔
