حیدرآباد: بی آر ایس کے ورکنگ پریسیڈنٹ کے ٹی راما راؤ نے پارٹی بدلنے والے ارکان اسمبلی سے متعلق SC Verdict Defector MLAsکا خیرمقدم کرتے ہوئے اسے جمہوری اقدار کے تحفظ کے لیے ایک اہم موڑ قرار دیا۔
سماجی رابطے کے پلیٹ فارم ‘ایکس’ پر ردعمل ظاہر کرتے ہوئے کے ٹی آر نے چیف جسٹس آف انڈیا کا شکریہ ادا کیا کہ انہوں نے ملک کی جمہوری ساخت کو “شرانگیز ہتھکنڈوں” سے بچایا۔ انہوں نے کہا کہ بی آر ایس سپریم کورٹ کے اس فیصلے کا پوری طرح خیرمقدم کرتی ہے۔
کانگریس قائد راہول گاندھی کو نشانہ بناتے ہوئے کے ٹی آر نے ان کے ’پنچ نیائے‘ وعدے کا حوالہ دیا اور لکھا:
“مسٹر راہول گاندھی! میں آپ کو چیلنج دیتا ہوں کہ آپ اپنے ہی وعظ پر قائم رہیں۔ مجھے امید ہے کہ آپ اور آپ کی پارٹی معزز اسپیکر کے عہدے کا غلط استعمال کر کے آئین ہند کا مذاق مزید نہیں بنائیں گے۔”
کے ٹی آر نے الزام لگایا کہ جن دس ارکان اسمبلی نے بی آر ایس چھوڑ کر کانگریس میں شمولیت اختیار کی، وہ “غیرقانونی طور پر” اپنی وفاداریاں تبدیل کر کے روزانہ کی بنیاد پر کانگریس پارٹی کے پروگراموں میں حصہ لے رہے ہیں۔
انہوں نے بی آر ایس کی قانونی ٹیم اور پارٹی کارکنوں کا بھی شکریہ ادا کیا کہ انہوں نے اس قانونی جنگ میں مسلسل ساتھ دیا۔
اپنی پوسٹ کے اختتام پر کے ٹی آر نے کہا:
“میری نظر میں اب ہمارے پاس ان 10 حلقوں میں ضمنی انتخابات کے لیے تین ماہ کا وقت ہے۔ کام پر لگ جائیے، دوستو!”
انہوں نے اپنی پوسٹ کا اختتام نعرے سے کیا:
“ستیہ میو جیتے”
