حیدرآباد: جموں و کشمیر سمیت چار ریاستوں کے سابق گورنر اور حالیہ برسوں میں آئینی عہدے پر فائز سب سے بے باک آوازوں میں شمار ہونے والے Satyapal Malikکا دہلی میں انتقال ہو گیا۔ وہ 79 برس کے تھے۔
ستیہ پال ملک کا انتقال رام منوہر لوہیا اسپتال میں ہوا، جہاں وہ گردوں سے متعلق پیچیدگیوں کے باعث زیر علاج تھے۔ ان کے انتقال کی تصدیق پیر کے روز ان کے آفیشل ایکس (سابق ٹوئٹر) اکاؤنٹ سے قریبی رفقاء کے ذریعہ کی گئی۔
ستیہ پال ملک نے اپنی طویل سیاسی زندگی کے دوران مختلف پارٹیوں کا حصہ رہتے ہوئے بہار، جموں و کشمیر، گوا اور میگھالیہ کے گورنر کے طور پر خدمات انجام دیں۔ ان کا دورِ گورنری خاص طور پر 2019 کے پلوامہ دہشت گرد حملے کے وقت کافی موضوع بحث رہا۔
اپریل 2023 میں دی وائر کو دیے گئے ایک انٹرویو میں ستیہ پال ملک نے دعویٰ کیا تھا کہ وزیر اعظم نریندر مودی نے اُنہیں پلوامہ حملے میں سیکیورٹی کی خامیوں پر خاموش رہنے کو کہا تھا۔ اس حملے میں 40 سی آر پی ایف جوان شہید ہوئے تھے۔
ستیہ پال ملک نے اپنے آخری ایّام میں مودی حکومت کی پالیسیوں اور قومی سلامتی کے معاملات پر کھل کر تنقید کی، جس کی وجہ سے وہ ایک غیر روایتی اور دوٹوک سیاسی شخصیت کے طور پر جانے گئے، حالانکہ وہ اعلیٰ آئینی مناصب پر بھی فائز رہ چکے تھے۔
ان کے انتقال پر سیاسی قائدین اور سرکاری سطح پر تعزیتی پیغامات جلد متوقع ہیں۔
