حیدرآباد: معروف اداکار Rana Daggubatiغیر قانونی آن لائن بیٹنگ ایپ کی تشہیر سے متعلق کیس میں ای ڈی کے روبرو پیش ہوئے۔ وہ پیر کے روز اپنے بیان کے اندراج کے لیے بشیر باغ میں انفورسمنٹ ڈائریکٹوریٹ کے زونل آفس پہنچے۔
حالیہ دنوں میں ای ڈی نے کئی تلگو فلمی شخصیات کو بیٹنگ پلیٹ فارمز سے وابستگی کے الزامات پر نوٹس جاری کیے تھے۔ رانا دگوباٹی ان افراد میں شامل ہیں جنہیں ایک بیٹنگ ایپ کے اشتہار میں نظر آنے کے بعد طلب کیا گیا۔ اس سے قبل سائبر آباد پولیس نے رانا اور دیگر نمایاں اداکاروں کے خلاف بیٹنگ کی تشہیر کے الزامات میں مقدمہ درج کیا تھا، جس کے بعد ای ڈی نے علیحدہ تحقیقات کا آغاز کیا۔
تحقیقی عہدیداروں نے رانا سے مالی لین دین اور بینک ریکارڈ کے بارے میں سوالات کیے، خاص طور پر ان ٹرانزیکشنز کے بارے میں جو بیٹنگ ایپ کی تشہیر سے منسلک تھے۔ تفتیش کار اس پہلو کا جائزہ لے رہے ہیں کہ آیا مشہور شخصیات کی طرف سے بیٹنگ پلیٹ فارمز کی تشہیر نے صارفین کو بڑے مالی نقصان کی طرف مائل کیا۔ حکام کے مطابق، کئی متاثرین اس قسم کی تشہیر سے متاثر ہو کر شدید مالی مشکلات کا شکار ہوئے، جن میں سے بعض نے مبینہ طور پر خودکشی کر لی۔
اب تک ای ڈی 36 فلمی شخصیات کو نوٹس جاری کر چکی ہے۔ رانا کو پہلے 23 جولائی کو پیش ہونا تھا لیکن انہوں نے نئی تاریخ کی درخواست کی، جس پر پیر کو پیشی ہوئی۔ اداکار منچو لکشمی کو 13 اگست کو طلب کیا گیا ہے، جبکہ پرکاش راج اور وجے دیورکونڈا پہلے ہی تفتیشی حکام کے سامنے پیش ہو کر اپنے بیانات جمع کرا چکے ہیں۔
بیٹنگ ایپ کیس کی تحقیقات جاری ہیں اور ای ڈی منی ٹریل اور اسپانسرشپ معاہدوں کا باریکی سے جائزہ لے رہی ہے تاکہ منی لانڈرنگ کی روک تھام کے قانون کی ممکنہ خلاف ورزیوں کا پتہ چلایا جا سکے۔
