حیدرآباد: کالیشورم لفٹ ایریگیشن اسکیم میں مبینہ بے قاعدگیوں کی تحقیقات کے لیے مقرر کردہ جسٹس پنکی چندر گھوش کی قیادت میں جاری [en]P C Ghosh Inquiry[/en] اب اپنے آخری مرحلے میں داخل ہو چکی ہے، اور ذرائع کے مطابق انکوائری کمیشن 27 جولائی تک ریاستی حکومت کو اپنی رپورٹ پیش کرے گا۔
اس کمیشن نے گزشتہ سال سے میڈی گڈہ، اننارم اور سندیلا بیراجس سے متعلق ڈیزائن، تعمیر، معیار، اور دیکھ بھال میں ہونے والی مبینہ کوتاہیوں کی چھان بین شروع کی تھی۔ تحقیقات کے دوران کمیشن نے سابق وزیر اعلیٰ کے چندر شیکھر راؤ، سابق وزیر آبپاشی ہریش راؤ، سابق وزیر مالیات ایٹالا راجندر سمیت کئی سینئر انجینئروں اور عہدیداروں کے بیانات ریکارڈ کیے اور ان کے حلف ناموں پر جرح بھی کی۔
ایک اہم پیش رفت کے طور پر کمیشن نے محکمہ آبپاشی کے سابق انجینئر ان چیف ایم انیل کمار کو 9 جولائی کو پوچھ گچھ کے لیے طلب کیا ہے۔ ان پر الزام ہے کہ انہوں نے میڈی گڈہ بیراج کے بنیاد سے متعلق مسائل کو چھپایا اور ایک اہم ٹیکنیکل عہدہ پر رہتے ہوئے گمراہ کن بیان دیا۔
جسٹس گھوش کی ٹیم نے سابق حکومت کی کابینہ میٹنگز کے منٹس بھی کا جائزہ لیا ہے، جو کالیشورم پراجیکٹ اور اس سے وابستہ کاموں سے متعلق ہیں۔
ذرائع کے مطابق انکوائری رپورٹ میں پیش کیے جانے والے نتائج ریاست کے سب سے بڑے آبپاشی منصوبوں میں سے ایک میں جوابدہی طے کرنے کے لیے اہم کردار ادا کریں گے۔
