حیدرآباد: بی آر ایس ایم ایل سی اور تلنگانہ جاگرُتی صدر کویتا نے جمعرات کے روز کوڈنگل-نرائن پیٹ لفٹ ایریگیشن پراجیکٹ سے Displaced Farmersکے لیے انصاف کا مطالبہ کرتے ہوئے ریاستی حکومت پر زمینی حقائق کو نظرانداز کرنے اور بغیر احتساب کے اخراجات بڑھانے کا الزام عائد کیا۔
دامرگڈہ منڈل کے کنکورٹلہ گاؤں میں متاثرہ کسانوں سے بات چیت کرتے ہوئے کویتا نے سوال کیا کہ جن بستیوں کو پانی بھی نہیں ملے گا، انہیں پائپ لائنوں کے لیے کیوں ڈبویا جا رہا ہے؟ انہوں نے کہا کہ 2,900 کروڑ روپئے کا پراجیکٹ کام شروع ہونے سے پہلے ہی 4,500 کروڑ تک پہنچ گیا، اور حیرت انگیز طور پر 600 کروڑ روپئے پیشگی بھی ادا کر دیے گئے۔
کویتا نے کہا کہ یہ منصوبہ صرف 1 لاکھ ایکڑ کو سیراب کرنے کیلئے ہے، جب کہ سابق وزیراعلیٰ کے چندر شیکھر راؤ کے دور میں شروع کردہ پلورنگا ریڈی لفٹ اسکیم 1.8 لاکھ ایکڑ کیلئے تھی۔ انہوں نے الزام لگایا کہ موجودہ حکومت نے منصوبے کا دائرہ کم کر دیا تاکہ سابق وزیراعلیٰ کو کریڈٹ نہ ملے، حالانکہ کے سی آر نے 90 فیصد سے زائد آبپاشی پراجیکٹس مکمل کر دیے تھے۔
کویتا نے مثال دی کہ کالیشورم پراجیکٹ میں بھی پائپ لائن کے ذریعے آبپاشی کی رسائی بڑھی، اور نظام آباد میں کسانوں کو خصوصی پیکیج کے تحت معاوضہ دیا گیا۔ انہوں نے مطالبہ کیا کہ کوڈنگل کے کسانوں کے ساتھ بھی یہی سلوک کیا جائے۔
انہوں نے کہا کہ اگر وزیراعلیٰ ریونت ریڈی واقعی پلورنگا کے فرزند ہیں تو انہیں سب سے پہلے پلورنگا ریڈی لفٹ اسکیم مکمل کرنی چاہیے۔ انہوں نے زور دے کر کہا کہ چیف منسٹر کی سطح پر لیے گئے فیصلے متاثرہ خاندانوں کے لیے دیرپا انصاف لائیں، نہ کہ نئی مصیبتیں۔
کویتا نے حکومت سے مطالبہ کیا کہ بےدخل کسانوں کے ساتھ دوبارہ مذاکرات کیے جائیں اور فی ایکڑ 35 سے 40 لاکھ روپئے معاوضہ کے ساتھ فی خاندان ایک سرکاری ملازمت دی جائے۔ جن افراد نے اپنی ساری زمینیں کھو دی ہیں، انہیں مکمل بازآبادکاری، رہائش اور بنیادی سہولیات فراہم کی جائیں۔
اس موقع پر مقامی قائدین گوینوور سرینواس، وینکٹ ریڈی، گیانیشور، دانپا، بالاکرشنا ریڈی، ہنومیا، سائی ریڈی، نارائنا سوامی اور ستیہ نارائنا ریڈی بھی موجود تھے۔
