حیدرآباد: سپریم کورٹ نے تلنگانہ قانون ساز اسمبلی کے اسپیکر کو حکم دیا ہے کہ وہ Defecting MLAsکے خلاف دائر نااہلی کی درخواستوں پر تین ماہ کے اندر فیصلہ کریں۔ عدالت نے واضح کیا کہ اس نوعیت کے معاملات میں غیر معینہ تاخیر ناقابل قبول ہے، اور اسپیکر کے لیے سخت وقت مقرر کیا ہے۔
چیف جسٹس بی آر گوائی کی قیادت والی بنچ نے یہ فیصلہ سناتے ہوئے براہ راست نااہلی کے مطالبے پر مبنی عرضی کو خارج کر دیا، اور تلنگانہ ہائی کورٹ کے ڈویژن بنچ کے سابقہ فیصلے کو بھی کالعدم قرار دیا۔ عدالت نے پارلیمنٹ سے بھی اپیل کی کہ وہ منحرف ارکان اسمبلی سے متعلق واضح قانون سازی پر غور کرے۔
یہ کیس ان 10 ارکان اسمبلی سے متعلق ہے جنہوں نے نومبر 2023 کے اسمبلی انتخابات میں بھارت راشٹرا سمیتی (BRS) کے ٹکٹ پر کامیابی حاصل کی، لیکن بعد میں حکمراں کانگریس پارٹی میں شامل ہو گئے۔
نااہلی کی درخواستیں بی آر ایس کے ارکان اسمبلی کے پی ویویکانند گوڑ، پدی کوشک ریڈی اور پارٹی کے ورکنگ پریسیڈنٹ کے ٹی راما راؤ نے دائر کی تھیں۔
جن ارکان اسمبلی کے خلاف نااہلی کی کارروائی زیر التوا ہے، ان میں دانم ناگندر، تیلم وینکٹ راؤ، کادیام سری ہری، پوچارم سرینواس ریڈی، اریکا پوری گاندھی، کالے یادیاہ، بندلا کرشنا موہن ریڈی، گڈم مہیپال ریڈی، ڈاکٹر سنجے اور پرکاش گوڑ شامل ہیں۔
عدالت نے تین دن تک جاری سماعت کے دوران ریاستی حکومت، بی آر ایس ارکان کے وکلا، اور کے ٹی راما راؤ کے وکیل کے دلائل سنے۔ بنچ نے 3 اپریل کو فیصلہ محفوظ رکھا تھا، جو اب سنایا گیا ہے۔
عدالت نے کہا کہ یہ معاملہ دو آئینی دفعات کے درمیان توازن کا متقاضی ہے—اسپیکر کی خودمختاری اور ارکان کے خلاف تادیبی کارروائی کی شفافیت۔
