حیدرآباد: تلنگانہ کے وزیر صحت دامودر راجہ نرسمہا نے ریاست میں جاری شدید بارشوں کے پیش نظر تمام اضلاع کے طبی و صحت حکام کو ہائی الرٹ Health Alertرہنے کی ہدایت دی ہے تاکہ کسی بھی عوامی صحت کے مسئلے کو بروقت روکا جا سکے۔
وزیر نے حیدرآباد میں اپنے کیمپ آفس سے بارش سے متاثرہ اضلاع کے صحت حکام کے ساتھ فون پر جائزہ اجلاس کیا۔ انہوں نے خاص طور پر میدک، کاماریڈی، سنگاریڈی، راجنا-سرسلہ ، سدی پیٹ اور شمالی تلنگانہ کے دیگر اضلاع میں عہدیداروں کو چوکس رہنے پر زور دیا۔
انہوں نے ہدایت دی کہ کم علاقوں میں رہنے والے افراد کو محفوظ مقامات پر منتقل کرنے کے لیے ایمبولنسیں تیار رکھی جائیں۔ سانپ کے کاٹنے اور موسمی بیماریوں کے علاج کے لیے لازمی ادویات کی دستیابی کو یقینی بنانے کا حکم دیا۔ پیش گوئی کے مطابق اگلے 2 تا 3 دن مزید بارشیں متوقع ہیں، اس لیے احتیاطی اقدامات پر عمل ضروری قرار دیا۔ وزیر نے یہ بھی کہا کہ ڈاکٹرز، نرسنگ اسٹاف، فارماسسٹ اور اسپتال کے عملے کو ڈیوٹی پر ہر وقت دستیاب رکھا جائے۔
فوری طبی امداد اور صفائی مہم
دامودر راجہ نرسمہا نے زور دیا کہ سینئر صحت حکام ضلعی انتظامیہ کے ساتھ مل کر بارش سے متاثرہ علاقوں میں فوری طبی امداد فراہم کریں۔ انہوں نے ہدایت دی کہ متاثرہ مقامات پر ہیلتھ کیمپس قائم کیے جائیں اور متعدی امراض کے پھیلاؤ کو روکنے کے لیے صفائی مہمات چلائی جائیں۔
مزید برآں، وزیر صحت نے کہا کہ محکمہ صحت کو بلدیہ، پنچایت، ریونیو، پولیس اور ڈیزاسٹر مینجمنٹ حکام کے ساتھ قریبی تال میل میں کام کرنا چاہیے تاکہ بارش سے متاثرہ علاقوں میں مؤثر طبی سہولتیں فراہم کی جا سکیں۔
