حیدرآباد: تلنگانہ میں Aarogyasri schemeکے تحت 30 لاکھ سے زائد نئے افراد کو شامل کر لیا گیا ہے کیونکہ ریاست نے نئے وائٹ راشن کارڈس جاری کیے ہیں جو اس سرکاری صحت انشورنس اسکیم کے لیے خودکار اہلیت فراہم کرتے ہیں۔
سرکاری عہدیداروں کے مطابق اب تک جملہ مستفیدین کی تعداد بڑھ کر 3.14 کروڑ ہو گئی ہے، جو کہ 93.99 لاکھ خاندانوں پر مشتمل ہے۔ اس سے قبل 90.10 لاکھ کارڈس کے تحت 2.84 کروڑ افراد مستفید ہو رہے تھے۔
ریاستی حکومت نے گزشتہ 20 مہینوں کے دوران خانگی اسپتالوں کے واجب الادا 1,590 کروڑ روپئے کلیئر کیے ہیں، جس کے بعد خانگی شعبہ صحت کی اسکیم میں دلچسپی میں نمایاں اضافہ دیکھا گیا ہے۔ اب تک 100 سے زائد اسپتال آروگیہ شری اسکیم سے وابستہ ہونے کی درخواست دے چکے ہیں۔
اسکیم کے تحت اب 10 لاکھ روپئے تک کے علاج کی سہولت دستیاب ہے، جو اس سے پہلے مقررہ حد سے دوگنا ہے۔ اس توسیع سے مہنگے طبی علاج اور پیچیدہ بیماریوں کے مریضوں کو خاطر خواہ فائدہ ہوگا۔
ریاستی وزیر صحت دامودھر راجنارسمہا نے حالیہ دنوں میں آروگیہ شری پیکیج نرخوں کا دس سال بعد جائزہ لیا اور خانگی اسپتالوں کی درخواست پر 22 فیصد اضافہ منظور کیا۔
محکمہ صحت کے مطابق اسکیم کا استعمال خاص طور پر گردوں کی بیماریوں اور دیگر دائمی امراض میں مبتلا مریضوں کے درمیان بڑھ گیا ہے۔ اس کی بنیادی وجہ بڑھا ہوا کوریج اور بہتر ادائیگی کا ڈھانچہ ہے، جس نے اسپتالوں کی شراکت کو بھی فروغ دیا ہے۔
