حیدرآباد: تلنگانہ کے وزیر ویویک وینکٹ سوامی نے کہا ہے کہ Kaleshwaramلفٹ ایریگیشن پراجیکٹ میں بے قاعدگیوں کے سلسلے میں شامل افراد کے خلاف سخت کارروائی کی جائے گی۔ انہوں نے کہا کہ جسٹس پی سی گھوش کمیشن کی رپورٹ میں کئی سنگین نکات سامنے آئے ہیں جن کی روشنی میں حکومت کوئی نرمی نہیں برتے گی۔
وزیر نے الزام لگایا کہ سابق بی آر ایس حکومت نے 1 لاکھ کروڑ روپئے مالیت کا یہ منصوبہ صرف کمیشن کے لیے میگھا انجینئرنگ اینڈ انفراسٹرکچر لمیٹڈ (MEIL) کے حوالے کیا تھا، جب کہ اتنی بڑی سرمایہ کاری کے باوجود عوام کو کوئی خاطر خواہ فائدہ نہیں پہنچا۔
میڈی گڈہ، انارم اور سندیلا بیراجوں میں تکنیکی خامیاں، ستونوں کا دھنس جانا، اور ڈیزائن کی کوتاہیاں سامنے آنے کے بعد منصوبے پر شدید تنقید کی جا رہی ہے۔ جسٹس پی سی گھوش کمیشن نے 15 ماہ کی تحقیقات کے بعد 650 صفحات پر مشتمل تین جلدوں کی رپورٹ یکم اگست کو پیش کی، جس میں 119 گواہوں کے بیانات شامل ہیں۔
رپورٹ میں سنگین بے ضابطگیوں کی نشاندہی کی گئی ہے، جن میں سائنسی تجربات کو نظر انداز کرنا، کابینہ کی منظوری کے بغیر تعمیرات شروع کرنا، اور اس وقت کے وزیراعلیٰ کے چندر شیکھر راؤ کے ساتھ ساتھ سابق وزراء ٹی ہریش راؤ اور ایٹلہ راجندر کے براہ راست ملوث ہونے کا ذکر شامل ہے۔
وزیر اُتم کمار ریڈی نے رپورٹ کو وزیراعلیٰ ریونت ریڈی کے حوالے کر دیا ہے، جس کے بعد ایک اسٹڈی کمیٹی تشکیل دی گئی ہے۔ کل منعقد ہونے والے کابینہ اجلاس میں اس رپورٹ پر تفصیلی غور کیا جائے گا۔ حکومت کی جانب سے امکان ہے کہ رپورٹ کو قانونی رائے کے لیے ایڈووکیٹ جنرل کو بھیجا جائے گا اور پھر اسمبلی میں پیش کیا جائے گا۔
About the Author
