حیدرآباد: جسٹس پی سی گھوش آج تلنگانہ حکومت کو Kaleshwaram Reportپیش کریں گے، جس کے ساتھ ہی میڈی گڈہ، انارم اور سندیلا بیراجس میں سامنے آنے والی ساختی خرابیوں پر مبنی 15 ماہ طویل تحقیقات کا اختتام ہو جائے گا۔
یہ رپورٹ ایک مہر بند لفافے میں بی آر کے بھون میں واقع کمیشن دفتر میں آبپاشی محکمہ کے اسپیشل چیف سکریٹری کو سونپی جائے گی۔
کالیشورم رپورٹ مارچ 2024 میں تشکیل دی گئی اُس کمیشن نے تیار کی ہے جسے میڈی گڈہ بیراج میں 2023 کے اواخر میں شدید نقصان اور دیگر دو مقامات پر رساؤ کے مسائل سامنے آنے کے بعد قائم کیا گیا تھا۔ دسمبر 2023 میں اقتدار سنبھالنے والی کانگریس حکومت نے ویجیلنس اور نیشنل ڈیم سیفٹی اتھارٹی (این ڈی ایس اے) کے معائنے کے ساتھ اس آزادانہ جانچ کا آغاز کیا تھا۔
جسٹس پی سی گھوش، جو سپریم کورٹ کے ریٹائرڈ جج اور آندھرا پردیش ہائی کورٹ کے سابق چیف جسٹس ہیں، نے اپریل میں تقرری کے بعد مئی 2024 میں باضابطہ طور پر تحقیقات کا آغاز کیا۔ رپورٹ کی تیاری کے دوران تکنیکی جانچ، گواہوں کے بیانات اور متعدد دستاویزات کی بنیاد پر کمیشن کی مدت میں کئی مرتبہ توسیع دی گئی۔
کمیشن نے اس دوران 119 افراد کے بیانات ریکارڈ کیے، جن میں اسسٹنٹ انجینئر سے لے کر انجینئر ان چیف تک کے عہدے دار، ڈیزائن اور دیکھ بھال سے وابستہ حکام، مختلف کمیٹیوں کے ارکان، ریٹائرڈ افسران، ٹھیکیدار، سابق آبپاشی اور مالیات محکمہ کے افسران شامل تھے۔
اہم سیاسی شخصیات جیسے سابق وزیر اعلیٰ کے چندر شیکھر راؤ، سابق وزراء ایٹلہ راجندر اور ہریش راؤ بھی آخری گواہوں میں شامل رہے۔
رپورٹ میں ممکنہ طور پر ساختی ناکامیوں کی ذمہ داری، منظوری کے عمل، سائٹ تبدیلیوں، اور اعلیٰ سطحی کمیٹیوں کے فیصلوں پر روشنی ڈالی جائے گی۔ جسٹس گھوش نے بیراجس کے ماہرین سے آزادانہ معائنے بھی کروائے تاکہ رپورٹ کی سچائی اور تکنیکی معیار یقینی بنایا جا سکے۔
جسٹس گھوش رپورٹ جمع کرانے کے ایک دن بعد جمعہ کو کولکتہ روانہ ہوں گے۔
About the Author
