حیدرآباد: حکومتِ تلنگانہ نے شہر میں بڑھتی ہوئی آبادی اور ٹریفک کے دباؤ سے نمٹنے کے لیے آرم گھر کے قریب ایک نیا RTC Bus Station قائم کرنے کا اعلان کیا ہے۔ یہ بات ریاستی وزیر ٹرانسپورٹ پونم پربھاکر نے پیر کے روز بتائی۔
وزیر نے کہا کہ حکومت کی ملکیت زمین پر ایک جدید سہولت سے آراستہ بس اسٹیشن کی تعمیر کے لیے تفصیلی منصوبہ بندی کی جا رہی ہے۔ انہوں نے بتایا کہ فی الحال حیدرآباد میں مہاتما گاندھی بس اسٹیشن (ایم جی بی ایس) اور جوبلی بس اسٹیشن (جے بی ایس) دو بڑے مراکز موجود ہیں، مگر یہ اب شہری تقاضوں کے لیے ناکافی ہو چکے ہیں۔
پربھاکر نے آرم گھر کے محل وقوع کو حکمتِ عملی کے اعتبار سے اہم قرار دیا، کیونکہ یہ راجیو گاندھی انٹرنیشنل ایئرپورٹ کے قریب واقع ہے اور محبوب نگر ضلع سے آنے والے مسافروں کے لیے بھی آسان رسائی فراہم کرتا ہے۔
انہوں نے کہا کہ مجوزہ آر ٹی سی بس اسٹیشن نہ صرف موجودہ ضروریات کو پورا کرے گا بلکہ مستقبل کے “فیوچر سٹی” جیسے ترقیاتی علاقوں کی مانگ کا بھی خیال رکھے گا۔ حکومت سے بس ڈیپو اور فیوچر سٹی کے لیے مخصوص اسٹیشن کی غرض سے زمین الاٹ کرنے کی درخواست کی جا چکی ہے۔
پربھاکر نے مزید کہا کہ خواتین کے لیے مفت سفر اسکیم کے آغاز کے بعد آر ٹی سی بس خدمات کی مانگ میں زبردست اضافہ ہوا ہے، جس کے پیش نظر حکومت حیدرآباد کے مختلف حصوں میں جدید، کشادہ اور اعلیٰ سہولتوں والے نئے بس اسٹیشنز تعمیر کرنے کا منصوبہ رکھتی ہے۔
