حیدرآباد: نظام آباد کے چندر شیکھر کالونی میں پیر کی نصف شب ایک ATM Robberyکی کوشش پولیس کی بروقت کارروائی سے ناکام بنا دی گئی۔ واردات اس وقت ہوئی جب نامعلوم افراد کا ایک گروہ ماروتی وین میں آکر مشین کو گیس کٹر سے کاٹنے لگا۔
پولیس کے مطابق ملزمین ابھی نقد رقم تک رسائی حاصل نہیں کر پائے تھے کہ اچانک ایک گشتی ٹیم وہاں سے گزری۔ پولیس کو دیکھ کر وہ گھبرا گئے اور فوری طور پر وین میں سوار ہو کر فرار ہوگئے۔
کچھ دیر بعد پولیس نے مذکورہ وین کو بسارا، ضلع نرمل کی سمت تیز رفتاری سے جاتے ہوئے دیکھا اور علاقے کی تمام ٹیموں کو چوکس کردیا۔ تعاقب کا اندازہ لگتے ہی ملزمین نے پالڈ گاؤں کے قریب وین چھوڑ دی اور قریبی کھیتوں میں فرار ہو گئے۔
پولیس نے ماروتی وین اور گیس کٹنگ کے آلات برآمد کر لیے ہیں۔ وین پر مہاراشٹرا نمبر پلیٹ ہونے کی وجہ سے شبہ ظاہر کیا جا رہا ہے کہ یہ گروہ بین ریاستی سطح پر سرگرم ہے۔ تفتیشی ٹیمیں سی سی ٹی وی فوٹیج اور فرانزک شواہد کی بنیاد پر ملزمین کو ٹریس کرنے کی کوشش کر رہی ہیں۔
