حیدرآباد: منچریال ضلع کے کاسی پیٹ منڈل میں پہلے Tiger Spottedاب گزشتہ دو دنوں سے ریبّینا اور تریانی منڈل کے جنگلات میں گھوم رہا ہے، محکمہ جنگلات کے عہدیداروں نے اس کی تصدیق کی ہے۔
حکام کے مطابق یہ شیر چند ماہ قبل مہاراشٹرا کے چندرپور ضلع میں واقع تاڈوبا اندھاری ٹائیگر ریزرو سے نئی چراگاہ کی تلاش میں تلنگانہ کی سرحد میں داخل ہوا ہے۔ ریبّینا میں مویشیوں پر حملے کے بعد نصب کردہ کیمرہ ٹریپ سے اس کی موجودگی کی تصدیق ہوئی۔
محکمہ جنگلات نے شیر کی نقل و حرکت پر نظر رکھنے کے لیے خصوصی ٹیمیں تعینات کی ہیں اور جنگلاتی علاقوں میں سی سی ٹی وی کیمرے نصب کیے جا رہے ہیں۔
کچھ دن قبل کاسی پیٹ میں شیر نے دو بچھڑوں کو ہلاک کر دیا تھا، جس کے بعد مقامی آبادی میں خوف و ہراس کی فضا پھیل گئی تھی۔
حکام نے دیہاتیوں کو مشورہ دیا ہے کہ وہ گھنے جنگل میں جانے سے گریز کریں، کھیتوں میں کام کرتے وقت جتھوں کی شکل میں رہیں اور جنگلاتی سرحدوں کے قریب محتاط رہیں تاکہ اچانک آمنا سامنا نہ ہو۔
