حیدرآباد:Commercial LPG سلنڈر کی قیمت میں 24 روپئے کی کمی کی گئی ہے، جس کے بعد 19 کلو وزنی سلنڈر کی نئی قیمت یکم جون سے پورے ملک میں ₹1,723.50 مقرر کی گئی ہے۔ یہ فیصلہ تیل کمپنیوں کی جانب سے ہفتہ کے روز عالمی خام تیل کی قیمتوں اور مارکیٹ رجحانات کی بنیاد پر ماہانہ جائزہ کے تحت کیا گیا۔
یہ گزشتہ چند مہینوں میں دوسرا موقع ہے جب کمرشیل ایل پی جی کی قیمت میں کمی کی گئی ہے۔ اس سے قبل یکم اپریل کو 41 روپئے کی کمی کی گئی تھی۔
اگرچہ گھریلو استعمال کے ایل پی جی سلنڈرز کی قیمتوں میں کوئی تبدیلی نہیں کی گئی، لیکن کمرشیل صارفین ، خاص طور پر چھوٹے کاروبار، ریستوران، اور ہوٹل انڈسٹری کے لیے یہ کمی کچھ حد تک راحت کا باعث بنی ہے۔
حکام کے مطابق مختلف ریاستوں میں مقامی ٹیکس اور ٹرانسپورٹ چارجز کی وجہ سے قیمتوں میں معمولی فرق ہو سکتا ہے، تاہم پورے بھارت کے لیے موجودہ قیمت ₹1,723.50 فی سلنڈر مقرر کی گئی ہے۔
واضح رہے کہ بھارت میں ایل پی جی کا تقریباً 90 فیصد حصہ گھریلو کھانا پکانے کے لیے استعمال ہوتا ہے، جبکہ بقیہ حصہ کمرشیل باورچی خانوں، صنعتی مقاصد، اور گاڑیوں میں استعمال کیا جاتا ہے۔
