حیدرآباد: تلنگانہ اسمبلی احاطے میں پیر کے روز BRS MLAsنے اچانک احتجاج کرتے ہوئے پارٹی چھوڑنے والے ارکان کی فوری برطرفی کا مطالبہ کیا۔
یہ احتجاج گاندھی جی کے مجسمہ کے سامنے اس وقت شروع ہوا جب بی آر ایس کے ارکان اسمبلی پر مشتمل ایک وفد اسپیکر گڈّم پرساد کمار سے ملاقات کے ارادے سے پہنچا، لیکن اطلاع ملی کہ اسپیکر دستیاب نہیں ہیں۔ اس پر ارکان نے نعرے بازی کرتے ہوئے مطالبہ کیا کہ پارٹی چھوڑنے والے ارکان کے خلاف سپریم کورٹ کے فیصلے کے مطابق فوری کارروائی کی جائے۔
بی آر ایس ارکان نے گاندھی مجسمہ کے سامنے ایک یادداشت بھی جمع کروائی، جس میں اسپیکر سے مطالبہ کیا گیا کہ منحرف ارکان کی رکنیت کو فوری طور پر منسوخ کیا جائے۔
احتجاج کے دوران اس وقت کشیدگی پیدا ہو گئی جب پولیس نے میڈیا نمائندوں کو احتجاج کی کوریج سے روک دیا۔ پولیس کا کہنا تھا کہ اسمبلی احاطہ میں میڈیا پر پابندیاں ہیں۔ اس پابندی کے خلاف صحافیوں اور پولیس کے درمیان مختصر نوک جھونک ہوئی، جس سے مقام احتجاج پر ہلکا تناؤ پیدا ہو گیا۔
احتجاج کے بعد بی آر ایس ارکان نے کہا کہ اگر اسپیکر نے فوری کارروائی نہیں کی تو وہ بڑے پیمانے پر ریاست گیر تحریک کا آغاز کریں گے۔
About the Author
