حیدرآباد: اداکار پرکاش راج بدھ کے روز Online Betting Appsکے پروموشن کیس میں انفورسمنٹ ڈائریکٹوریٹ (ای ڈی) کے سامنے پیش ہونے کا امکان ہے۔ ای ڈی نے 21 جولائی کو متعدد سلیبریٹیز کو سمن جاری کرتے ہوئے پوچھ گچھ کے لیے طلب کیا تھا۔
منگل کی رات تک ای ڈی حکام کو پرکاش راج کی طرف سے کوئی باضابطہ اطلاع موصول نہیں ہوئی تھی، تاہم توقع ہے کہ وہ مقررہ تاریخ پر حاضر ہوں گے۔
یہ تحقیقات پنجہ گٹہ، میاںپور، سائبرآباد، سوریہ پیٹ اور وشاکھا پٹنم میں درج ایف آئی آرز پر مبنی ہے، جن میں قرض اور بیٹنگ ایپس کے خلاف مقدمات شامل ہیں۔ انہی بنیادوں پر ای ڈی نے ایک انفورسمنٹ کیس انفارمیشن رپورٹ (ECIR) درج کرتے ہوئے 29 افراد کو نامزد کیا، جن میں اداکار، سوشل میڈیا انفلوئنسرز اور دیگر شخصیات شامل ہیں۔
جن مشہور شخصیات کو طلب کیا گیا ہے ان میں اداکار وجئے دیور کونڈہ اور رانا دگگوبتی بھی شامل ہیں۔ رانا کو ابتدائی طور پر 23 جولائی کو طلب کیا گیا تھا، لیکن فلم شوٹنگ کے سبب انہوں نے وقت مانگا۔ اسی طرح وجئے دیور کونڈہ کو 6 اگست کو بلایا گیا تھا، جنہوں نے بھی مہلت طلب کی۔ اب دونوں کو 11 اگست کو دوبارہ طلب کیا گیا ہے۔
اداکارہ منچو لکشمی کو 13 اگست کو پوچھ گچھ کے لیے بلایا گیا ہے۔
ای ڈی نے ان افراد سے ان ایپس کے پروموشن میں مبینہ کردار کے بارے میں تفصیلات مانگی ہیں، جو غیر قانونی آن لائن بیٹنگ اور قرض فراہمی میں ملوث پائی گئی ہیں۔
About the Author
