حیدرآباد: نظام انسٹیٹیوٹ آف میڈیکل سائنسز (این آئی ایم ایس) نے صرف چھ ماہ کے دوران Kidney Transplants کی 100 کامیاب سرجریز مکمل کر کے قومی سطح پر ایک نئی مثال قائم کی ہے۔ ان میں سے چار پیوندکاریاں روبوٹ کی مدد سے انجام دی گئیں۔
ریاستی سرکاری اسپتال این آئی ایم ایس اب ملک کے ممتاز گردے کی پیوندکاری مراکز میں شمار ہونے لگا ہے۔ تمام آپریشنز آروگیہ شری اسکیم کے تحت انجام دیے گئے، جس کی بدولت غریب مریضوں کو مفت علاج کی سہولت فراہم ہوئی۔
این آئی ایم ایس نے 1989 میں گردے کی پیوندکاری کا آغاز کیا تھا، مگر 2015 میں ڈاکٹر رام ریڈی کے محکمہ یورولوجی کے انچارج بننے کے بعد اس میں نمایاں تیزی آئی۔ سینئر پروفیسر ڈاکٹر راہول دیوراج کے اشتراک سے پچھلی دہائی میں ایک ہزار سے زائد پیوندکاریاں مکمل ہو چکی ہیں۔
ڈاکٹر رام ریڈی نے منگل کے روز کہا کہ یہ سال خاص رہا کیونکہ صرف چھ مہینوں میں 100 آپریشنز مکمل کیے گئے۔ ڈاکٹر دیوراج کے مطابق شعبہ ہر ماہ 1,000 سے زیادہ یورولوجی سے متعلق آپریشن انجام دیتا ہے، اور گزشتہ دو برس میں 350 سے زائد روبوٹ کی مدد سے سرجریز مکمل کی گئیں۔
سابق بی آر ایس حکومت کے دور میں اسپتال کو جدید آلات فراہم کیے گئے اور آروگیہ شری کے تحت پیچیدہ آپریشنز کی رسائی کو عام کیا گیا۔ اسپتال کے تقریباً 90 فیصد مریض غریب طبقے سے تعلق رکھتے ہیں، جنہیں این آئی ایم ایس میں مفت اور معیاری علاج میسر آتا ہے۔
About the Author
