حیدرآباد: تیل کی سرکاری کمپنیوں نے ایک بار پھر کمرشیل LPG Cylinderکی قیمتوں میں کمی کا اعلان کیا ہے۔ تازہ ترین کمی کے تحت 19 کلوگرام کے کمرشیل سلنڈر کی قیمت میں 51.50 روپئے کی کمی کی گئی ہے۔ نئی قیمتیں آج سے پورے ملک میں نافذ ہوگئی ہیں۔
کمرشیل ایل پی جی کی نئی قیمتیں
اس کمی کے بعد دہلی میں 19 کلوگرام کمرشیل ایل پی جی سلنڈر کی قیمت اب 1,580 روپئے ہے۔ عہدیداروں نے وضاحت کی کہ یہ ایندھن کی قیمتوں کے ماہانہ جائزے کے تحت معمول کی ترمیم ہے۔
گزشتہ تین ماہ کے دوران کمرشیل ایل پی جی سلنڈروں کی قیمتوں میں مسلسل کمی درج کی گئی ہے—جون میں 24 روپئے ، جولائی میں 58.50 روپئے اور اگست میں 33.50 روپئے ۔ حکام کے مطابق یہ کمی عالمی خام تیل کی قیمتوں اور بدلتے مارکیٹ رجحانات سے جڑی ہوئی ہے۔
کاروباری اداروں کو سہولت، گھریلو صارفین کو مایوسی
ہوٹلوں، ریستورانوں اور دیگر کاروباروں کے لیے یہ کمی کسی راحت سے کم نہیں، تاہم گھریلو صارفین کے لیے کوئی خوشخبری نہیں کیونکہ 14.2 کلوگرام کے گھریلو LPG Cylinder کی قیمت میں کوئی تبدیلی نہیں کی گئی۔ اس سے عام اور متوسط طبقے کے خاندان مایوس نظر آرہے ہیں۔
پردھان منتری اجولا یوجنا کے تحت سبسڈی میں توسیع
دوسری طرف مرکزی کابینہ نے پردھان منتری اجولا یوجنا کے تحت گھریلو ایل پی جی سلنڈروں پر 300 روپئے سبسڈی کی مدت 2025–26 تک بڑھانے کی منظوری دے دی ہے۔ یہ سبسڈی ہر سال زیادہ سے زیادہ 9 بار ریفل پر دستیاب ہوگی۔
حکومت نے اس منصوبے کے لیے 12,000 کروڑ روپئے مختص کیے ہیں۔ 1 جولائی 2025 تک ملک بھر میں تقریباً 10.33 کروڑ اجولا کنکشن فعال ہیں۔
About the Author
