حیدرآباد: شہر میں 24 گھنٹوں کے دوران دو بڑے Fire Accidentsرپورٹ ہوئے، ایک موسیٰ پیٹ بھارت نگر فلائی اوور کے قریب اور دوسرا کُشائی گوڑہ کے ایک اسکریپ گودام میں۔
پہلا واقعہ
پیر کی شام موسیٰ پیٹ میں بھارت نگر فلائی اوور کے ساتھ موجود ایک خالی پلاٹ میں پیش آیا۔ اچانک آگ بھڑک اُٹھی اور دیکھتے ہی دیکھتے ایک آٹو رکشہ شعلوں کی لپیٹ میں آکر مکمل طور پر جل گیا۔ علاقے میں دھواں پھیل گیا جس پر مقامی افراد نے فوراً فائر سروس کو اطلاع دی۔ فائر فائٹرز موقع پر پہنچے اور آگ پر قابو پا لیا۔ خوش قسمتی سے کوئی جانی نقصان نہیں ہوا۔ آگ لگنے کی اصل وجہ ابھی تک معلوم نہیں ہو سکی۔
دوسرا واقعہ
اتوار کی رات تقریباً 9.30 بجے کُشائی گوڑہ کے ایک اسکریپ گودام میں پیش آیا۔ اچانک لگی آگ تیزی سے پھیل گئی اور قریبی رہائشی علاقے دھوئیں سے بھر گئے جس سے مکینوں میں خوف و ہراس پھیل گیا۔ پولیس اور فائر برگیڈ کی تین گاڑیاں موقع پر پہنچیں اور طویل جدوجہد کے بعد شعلوں پر قابو پایا گیا۔
ابتدائی تحقیقات میں شبہ ظاہر کیا گیا ہے کہ آگ شارٹ سرکٹ کی وجہ سے لگی۔ گودام مالکان نے بھاری نقصان کی تصدیق کی۔ پولیس نے واقعے کی تحقیقات کے لیے مقدمہ درج کر لیا ہے۔
