حیدرآباد: تلنگانہ پردیش کانگریس کمیٹی Telangana Congressکی پولیٹیکل افیئرس کمیٹی کا اجلاس گاندھی بھون میں آل انڈیا کانگریس کمیٹی کی انچارج میناکشی نٹراجن کی صدارت میں منعقد ہوا۔ اس اجلاس میں وزیراعلیٰ ریونت ریڈی، ڈپٹی چیف منسٹر ملو بھٹی وکرمارکا، پی سی سی صدر مہیش کمار گوڑ، وزراء اور کمیٹی ارکان شریک ہوئے۔
اجلاس میں سات اہم امور پر بحث ہوئی جن میں ہائی کورٹ کی ہدایت کے بعد بلدی انتخابات کی تیاری اور پسماندہ طبقات کے لیے 42 فیصد ریزرویشن کے نفاذ کا معاملہ شامل تھا۔ پی اے سی نے آل انڈیا کانگریس کمیٹی کی ہدایت پر ریاست گیر “ووٹ کی چوری اور اقتدار خالی کرو” مہم کو تیز کرنے کا منصوبہ بھی بنایا۔
وزیراعلیٰ ریونت ریڈی نے اس موقع پر “ووٹ کی چوری” مہم کا لوگو جاری کیا۔ اجلاس میں انڈیا بلاک کی جانب سے تلنگانہ سے تعلق رکھنے والے جسٹس سدھرسن ریڈی کو نائب صدر جمہوریہ کا امیدوار نامزد کرنے کے فیصلے کا خیرمقدم کیا گیا۔
پی سی سی صدر مہیش کمار گوڑ نے الزام لگایا کہ بھارتیہ جنتا پارٹی نے تیسری بار اقتدار دھاندلی کے ذریعے حاصل کیا ہے۔ انہوں نے کہا کہ راہل گاندھی کی “ووٹ کی چوری” کے خلاف مہم کو تلنگانہ بھر میں بڑے پیمانے پر فروغ دیا جائے گا۔ ان کا کہنا تھا کہ کانگریس حکومت کی عوامی فلاحی اسکیمیں جیسے کسان بھروسہ، قرض معافی، راشن کارڈز، اندیرما ہاؤسنگ اور عمدہ چاول کی تقسیم کو عوام سے بھرپور تائید حاصل ہو رہی ہے۔
انہوں نے مزید کہا کہ پارٹی کی پیدل یاترا کو بھی عوامی سطح پر زبردست حمایت ملی ہے۔ جوبلی ہلز اسمبلی ضمنی انتخاب کی تیاریوں پر بھی اجلاس میں غور کیا گیا اور کہا گیا کہ یہ انتخابی معرکہ حکمت عملی کے لحاظ سے نہایت اہمیت رکھتا ہے۔ پی اے سی نے فیصلہ کیا کہ اس سلسلے میں جامع منصوبہ بندی کی جائے گی۔
مہیش کمار گوڑ نے بی آر ایس پر تنقید کرتے ہوئے کہا کہ اس نے یوریا کی قلت کے بارے میں غلط افواہیں پھیلا کر کسانوں میں خوف پیدا کرنے اور سیاسی فائدہ اٹھانے کی کوشش کی ہے۔ اجلاس میں پارٹی کی داخلی تنظیمی مضبوطی اور ریاست بھر میں مختلف کمیٹیوں کی تشکیل کا بھی جائزہ لیا گیا۔
About the Author
