حیدرآباد: وزیراعلیٰ ریونت ریڈی نے کہا کہ حیدرآباد کی ترقی مختلف قائدین کے وژن سے جڑی ہوئی ہے لیکن اب وقت آگیا ہے کہ شہر کو عالمی معیار کے ہم پلہ بنایا جائے۔ انہوں نے بدھ کے روز گچی باؤلی میں انٹیگریٹڈ سب رجسٹرار آفس کی سنگ بنیاد رکھی۔
وزیراعلیٰ Revanth Reddyنے اس بات پر فخر کا اظہار کیا کہ انفوسس، مائیکروسافٹ اور گوگل جیسی بڑی آئی ٹی کمپنیاں حیدرآباد میں سرگرم ہیں۔ انہوں نے این چندرا بابو نائیڈو اور وائی ایس راج شیکھر ریڈی کی خدمات کو سراہا اور کہا کہ کانگریس حکومتوں نے ہائی ٹیک سٹی کا آغاز کیا جسے نائیڈو نے مزید وسعت دی۔ ساتھ ہی انہوں نے یاد دلایا کہ راجیو گاندھی نے بھارت میں آئی ٹی انقلاب کی بنیاد رکھی تھی۔
ریونت ریڈی نے کہا کہ آئی ٹی شعبہ اب بھی ریاست کی آمدنی کا بنیادی ذریعہ ہے اور تلگو پروفیشنلز کی بڑی تعداد سیلیکان ویلی میں نمایاں ہے۔ انہوں نے زور دیا کہ حیدرآباد کو نیو یارک، ٹوکیو اور سنگاپور جیسے شہروں کا مقابلہ کرنا ہوگا۔ تاہم انہوں نے موسی ندی کی بحالی اور مجوزہ فیوچر سٹی کے مخالفین کو تنقید کا نشانہ بنایا اور کہا کہ ماضی میں بھی ہائی ٹیک سٹی اور آؤٹر رنگ روڈ جیسے منصوبوں کا مذاق اڑایا گیا تھا۔
انہوں نے کہا کہ کوئی بھی موسی کی گندگی میں جینا نہیں چاہتا اور اس ندی کی صفائی پرانا شہر کو “گولڈ سٹی” بنانے کا کلیدی حصہ ہے۔ ساتھ ہی انہوں نے راجیو سوگرُہا اسکیم کے تحت سستی رہائش فراہم کرنے کا بھی وعدہ کیا۔
وزیراعلیٰ نے زور دیا کہ سرکاری دفاتر کی جدیدکاری وقت کی اہم ضرورت ہے۔ انہوں نے کہا کہ یہ افسوسناک ہے کہ سب رجسٹرار دفاتر جو بھاری آمدنی فراہم کرتے ہیں بنیادی سہولتوں سے بھی محروم ہیں۔ انہوں نے اعلان کیا کہ گچی باؤلی کا نیا دفتر آٹھ ماہ میں مکمل کردیا جائے گا۔ آخر میں انہوں نے کہا کہ جو لوگ حیدرآباد کی ترقی میں رکاوٹ بن رہے ہیں وہ شہر کے دشمن ہیں اور عوام کو چاہیے کہ ان کا مقابلہ کریں۔
About the Author
