حیدرآباد: محکمہ انکم ٹیکس کے افسران نے مسلسل دوسرے دن بھی حیدرآباد میں بڑے پیمانے پر IT Raidsجاری رکھے۔ کارروائی کا مرکز سابق چیوڑلہ ایم پی رنجیت ریڈی اور ان کے مالی تعلقات DSR گروپ کی تعمیراتی کمپنیوں سے رہا۔
چھاپے منگل کی صبح شروع ہوئے، جن میں DSR کے رئیل اسٹیٹ پراجیکٹس سے جڑے کیش لین دین کو نشانہ بنایا گیا۔ ٹیموں نے DSR Infrastructure، DSR Builders & Developers اور DSR Prime Space کے دفاتر کی تلاشی لی۔
ذرائع کے مطابق رنجیت ریڈی DSR گروپ میں پارٹنر ہیں۔ آئی ٹی ٹیموں نے بڑی مقدار میں غیر محسوب کیش اور اہم دستاویزات ضبط کیں۔ ایک ٹیم رات بھر ان کی رہائش گاہ پر موجود رہی۔
افسران نے DSR مینجمنٹ سے جڑے کئی بینک لاکرز بھی ٹریس کیے ہیں، جنہیں آج کھولا جانا متوقع ہے۔
چھاپوں کا دائرہ سرینواس کنسٹرکشنز اور سرینواس انفرا تک بھی بڑھایا گیا ہے، جن پر آندھرا پردیش شراب گھوٹالے سے تعلقات کے الزامات ہیں۔ تحقیقات میں ان کمپنیوں کے مالی ریکارڈز کو کھنگالا جا رہا ہے۔
ابھی تک حکام نے مکمل نتائج ظاہر نہیں کیے ہیں۔ ذرائع کا کہنا ہے کہ یہ آپریشن بدستور جاری ہے۔
