حیدرآباد: میئر گدوال وجیہ لکشمی نے شہر کی بستیوں میں Sanitation Driveشروع کرنے کا حکم دیتے ہوئے جی ایچ ایم سی کے عہدیداروں اور عملے کو ہدایت دی کہ صفائی کو اولین ترجیح دی جائے، بصورت دیگر غفلت برتنے والوں کے خلاف کارروائی کی جائے گی۔ پیر کے روز انہوں نے زونل کمشنر انوراگ جینتی کے ساتھ جوبلی ہلز سرکل کے امبیڈکر نگر اور اودے نگر کا دورہ کیا۔
میئر نے صفائی ٹیموں کو ہدایت دی کہ برسات کے موسم میں کچرے کی جلد نکاسی کو یقینی بنائیں تاکہ موسمی امراض سے بچاؤ ہو سکے۔ انہوں نے خبردار کیا کہ کام میں کوتاہی برتنے والے ملازمین کے خلاف سخت کارروائی کی جائے گی۔ مزید کہا کہ جو بھی شخص بستیوں میں تعمیراتی ملبہ ڈالے گا، اس پر جرمانہ عائد کیا جائے گا۔
امبیڈکر نگر میں معائنہ کے دوران انہوں نے نالے کی حفاظتی دیوار کا ایک حصہ ٹوٹا ہوا دیکھا اور انجینئرز کو فوری حفاظتی اقدامات کرنے کی ہدایت دی تاکہ حادثات سے بچا جا سکے۔ دونوں بستیوں کی سڑکوں کے کنارے سے تعمیراتی ملبہ فوری ہٹانے کا بھی حکم دیا۔
بعد میں وہ بنجارہ ہلز روڈ نمبر 1 پر ورنچی اسپتال کے قریب مہیشوری ٹاورز کے سامنے پہنچیں، جہاں سڑک کا ایک حصہ دھنس چکا تھا۔ اس مقام پر 19 میٹر آر سی سی سلیب کے لیے 65 لاکھ روپئے پہلے ہی منظور کیے جا چکے ہیں۔ وجیہ لکشمی نے انجینئرنگ عملے کو فوری کام شروع کرنے اور جلد مکمل کرنے کی ہدایت دی۔ مقامی رہائشیوں نے فنڈز کی فوری منظوری پر ان کا شکریہ ادا کیا۔
چیف انجینئر رتناکر، ڈپٹی کمشنر سمّیا اور دیگر عہدیدار معائنہ کے دوران ان کے ہمراہ تھے۔
About the Author
