حیدرآباد: فلپائن اور تلنگانہ کے درمیان زرعی تجارت میں نئی پیش رفت کے تحت ریاستی وزیر خوراک و رسد این اُتّم کمار ریڈی اور فلپائن کے وزیر زراعت فرانسسکو پی ٹیو لوریل جونیئر کے درمیان ایک اعلیٰ سطحی ملاقات ہوئی جس میں تلنگانہ چاول Telangana riceکی برآمدات پر غور کیا گیا۔
فلپائن کے وزیر زراعت نے تلنگانہ کے چاول کے معیار کی تعریف کرتے ہوئے آئندہ سال میں 2 لاکھ میٹرک ٹن چاول اور دھان درآمد کرنے میں دلچسپی ظاہر کی۔ انہوں نے ریاست کے مشہور سونا (RNR 15048) چاول اور مکئی (maize) کی فراہمی سے متعلق بھی سوالات کیے۔
سونا اور دھان کی برآمد پر مثبت اشارہ
وزیر اتّم کمار ریڈی نے فلپائن کی دلچسپی کا خیرمقدم کیا اور یقین دلایا کہ حکومت تلنگانہ زرعی تجارتی تعلقات کو مضبوط بنانے میں مکمل تعاون فراہم کرے گی۔ ایک اہم پیش رفت کے طور پر، فلپائن نے چاول کے ساتھ دھان برآمد کرنے کی تجویز کی حمایت کی، جسے مستقبل کی تجارتی حکمت عملی میں نقطۂ تبدیلی تصور کیا جا رہا ہے۔
دوروں کا تبادلہ اور تعاون کی توسیع
تلنگانہ وزیر نے فلپائن کے ہم منصب کو ریاست کے دورے کی دعوت دی جو قبول کر لی گئی۔ جواباً فلپائن کی حکومت کی جانب سے منیلا کے دورے کی دعوت دیے جانے کی بھی توقع ہے۔
سرکاری بیان کے مطابق، دونوں فریقین نے زرعی شعبے میں مسلسل اشتراک کو فروغ دینے پر اتفاق کیا ہے اور آئندہ مہینوں میں پیش رفت برقرار رکھنے کے عزم کا اظہار کیا۔
About the Author
