حیدرآباد: حیدرآباد نارکوٹکس انفورسمنٹ ونگ (H-NEW) اور عنبر پیٹ پولیس نے مشترکہ کارروائی کرتے ہوئے پوست کی اسمگلنگ میں ملوث ایک شخص کو گرفتار کر لیا۔ ملزم کے قبضے سے 21 کلو گرام Poppy Husk، نشہ ساز آلات اور دیگر اشیاء برآمد کی گئیں جن کی مجموعی مالیت تقریباً 3.5 لاکھ روپئے بتائی گئی ہے۔
ملزم کی شناخت 44 سالہ منگلا رام کے طور پر ہوئی ہے، جو راجستھان کے ضلع باڑمیر سے تعلق رکھتا ہے اور حیدرآباد کے چنگی چرلہ علاقے میں مقیم ہے۔ پولیس کے مطابق، وہ پیشہ سے اسٹیل ویلڈر ہے، لیکن کم آمدنی اور نشے کی لت کے باعث اس نے غیر قانونی منشیات کی خرید و فروخت کا راستہ اختیار کیا۔
تحقیقات سے معلوم ہوا ہے کہ منگلا رام راجستھان سے سستی قیمت پر پوست حاصل کر کے حیدرآباد میں منافع کے لیے فروخت کرتا تھا۔ پولیس نے اس کے قبضے سے ایک مکسر گرائنڈر، دو جار، وزن تولنے کی مشینیں، چھلنی، دو موبائل فون، اور ایک ہیرو اسپلنڈر موٹر سائیکل بھی ضبط کی ہے۔
یہ مقدمہ عنبر پیٹ پولیس اسٹیشن میں کرائم نمبر 347/2025 کے تحت نارکوٹک ڈرگس اینڈ سائکوٹروپک سبسٹینسز (NDPS) ایکٹ کے تحت درج کیا گیا ہے۔
حکام نے کہا ہے کہ غیر مستحکم آمدنی والے افراد اکثر نشہ آور اشیاء کی اسمگلنگ میں ملوث ہو جاتے ہیں۔ عوام سے اپیل کی گئی ہے کہ وہ منشیات سے متعلق کسی بھی مشتبہ سرگرمی کی اطلاع H-NEW ہیلپ لائن 8712661601 پر دیں۔
About the Author
