حیدرآباد: تلنگانہ میں خریف اور ربی سیزن کے دوران موٹے دھان کی بھرپور پیداوار کے نتیجے میں ریاست اس وقت 34 لاکھ ٹن سے زائد اضافی موٹے چاول کے ذخیرے سے نمٹنے کی جدوجہد کر رہی ہے، جبکہ عوامی تقسیم نظام Coarse rice surplusمیں اس کی طلب نہایت محدود ہے۔
ریاستی سول سپلائیز کارپوریشن نے اب تک کسانوں سے 51 لاکھ ٹن موٹا دھان اور 23.27 لاکھ ٹن باریک دھان خرید چکی ہے۔ تاہم راشن شاپس کے ذریعے صرف باریک چاول کی تقسیم عمل میں آتی ہے، جس کے باعث موٹے چاول کا بڑا حصہ بھی غیر استعمال شدہ رہ جاتا ہے۔
یہ معاملہ حالیہ ریاستی کابینہ اجلاس میں زیربحث آیا، جہاں بغیر فروخت ذخائر کے متبادل استعمالات پر غور کیا گیا۔ ربی کے موسم میں موسمی حالات کے سبب موٹے دھان کی بوائی عام ہوتی ہے، اور حالیہ باریک چاول کے بونس کے باوجود کسانوں کی اکثریت نے موٹے دھان کی فصل ہی کو ترجیح دی، جس کے نتیجے میں اس سال ربی کی پیداوار کا تقریباً دو تہائی حصہ موٹے دھان پر مشتمل رہا۔
ریاستی حکومت فیول گریڈ ایتھنول کی تیاری کے لیے موٹے چاول کی فروخت پر غور کر رہی ہے۔ کچھ ایتھنول پیدا کرنے والی فرموں نے حکومت سے رجوع کرتے ہوئے چاول کی فراہمی کی خواہش ظاہر کی ہے، جو پٹرول میں 20 فیصد تک آمیزش کی اجازت رکھتا ہے۔ کابینہ نے اس تجویز پر بحث کی مگر حتمی فیصلہ مؤخر کر دیا۔
دوسری جانب بعض ریاستوں نے فوڈ کارپوریشن آف انڈیا (ایف سی آئی) سے تلنگانہ کے موٹے چاول کے ذخیرے سے الاٹمنٹ کی درخواست کی ہے۔ تاہم یہ واضح نہیں کہ ایف سی آئی اپنے مرکزی پول کو تلنگانہ سے بڑھائے گی یا نہیں۔ حکام کا کہنا ہے کہ ایف سی آئی کے فیصلے سے ہی ریاستی سطح پر ذخیرہ جات کی صفائی کی حکمت عملی طے پائے گی۔
