حیدرآباد: 2008 کے Malegaon Blast Caseمیں تمام سات ملزمان کو جمعرات کے روز ایک خصوصی این آئی اے عدالت نے شواہد کی کمی کی بنیاد پر بری کر دیا۔ بری ہونے والوں میں بی جے پی رکن پارلیمنٹ سادھوی پرگیہ سنگھ ٹھاکر اور لیفٹیننٹ کرنل پرساد شری کانت پروہت شامل ہیں۔
عدالت نے غیرقانونی سرگرمیوں کی روک تھام ایکٹ (یو اے پی اے)، آرمز ایکٹ اور تعزیرات ہند کی تمام دفعات کے تحت عائد الزامات کو خارج کر دیا۔ یہ فیصلہ ایک ایسے مقدمے میں آیا ہے جو گزشتہ 17 برسوں سے ملک کے سب سے حساس اور سیاسی طور پر متنازع دہشت گردی معاملات میں شامل رہا ہے۔
یہ دھماکہ 29 ستمبر 2008 کو ناسک ضلع کے مالیگاؤں شہر میں واقع بھیکو چوک مسجد کے قریب ہوا تھا، جب ایک موٹر سائیکل میں نصب بم رمضان کے مہینے اور نوراتری سے قبل پھٹا۔ اس واقعے میں 6 افراد جاں بحق اور 100 سے زائد زخمی ہوئے تھے۔
عدالت میں فیصلہ سناتے وقت تمام ملزمان موجود تھے۔ جج نے اعلان کیا کہ مہلوکین کے اہل خانہ کو 2 لاکھ روپئے فی کس اور زخمیوں کو 50 ہزار روپئے فی کس معاوضہ دیا جائے گا۔
ابتدائی تفتیش مہاراشٹرا اے ٹی ایس نے کی تھی، لیکن 2011 میں معاملہ نیشنل انویسٹی گیشن ایجنسی (این آئی اے) کو منتقل کر دیا گیا۔ مقدمے کی سماعت میں ایک لاکھ سے زائد صفحات پر مشتمل دستاویزات اور 323 گواہوں کو شامل کیا گیا، جن میں سے 34 نے گواہی سے انکار کر دیا۔
2016 میں این آئی اے نے کئی ملزمان کے خلاف دہشت گردی کے الزامات ہٹا دیے تھے، جن میں سادھوی پرگیہ بھی شامل تھیں۔
تمام ملزمان پہلے سے ضمانت پر تھے۔ اس فیصلے کے ساتھ ہی برسوں سے جاری قانونی اور سیاسی رسہ کشی اپنے انجام کو پہنچی۔
About the Author
