حیدرآباد: گولکنڈہ کے قریب ابراہیم باغ ملٹری زون میں Leopard Alertایک چیتے کو سڑک عبور کرتے ہوئے سی سی ٹی وی کیمروں میں قید کیا گیا، جس کے بعد شہر میں جنگلی جانوروں کی موجودگی پر نئی تشویش پیدا ہو گئی ہے۔
پولیس کے مطابق یہ چیتا تراماتی کے عقب سے موسیٰ ندی کی طرف جاتا ہوا دیکھا گیا۔ گولکنڈہ پولیس نے فوری طور پر محکمہ جنگلات کو الرٹ کیا، جو پہلے ہی منچریولا اور نرسنگی میں چیتے کی موجودگی پر نظر رکھے ہوئے ہے۔
محکمہ جنگلات نے گرے ہاؤنڈز علاقے کے قریب چار پنجرے اور کئی ٹریپ کیمرے نصب کیے ہیں تاکہ چیتے کو پکڑا جا سکے۔ تاہم اب تک کی مسلسل نگرانی کے باوجود وہ قابو میں نہیں آ سکا۔
علاقہ کے مکینوں کو، خاص طور پر رات کے وقت، محتاط رہنے کی ہدایت دی گئی ہے۔ حکام نے بتایا کہ چیتے کی نقل و حرکت شہری حدود کے قریب برقرار ہے، جس کے پیش نظر مزید حفاظتی اقدامات پر غور کیا جا رہا ہے۔
