حیدرآباد: آلیر پولیس نے ہفتہ کے روز ایک عادی Bike Thief اور اس کے نابالغ ساتھی کو گرفتار کرتے ہوئے چار مسروقہ دو پہیہ گاڑیاں برآمد کر لیں، جن کی مجموعی مالیت تقریباً 4 لاکھروپئے ہے۔ یہ کارروائی نیشنل ہائی وے 163 پر واقع چودری دھابہ کے قریب علی الصبح گشت کے دوران ساؤتھ ایسٹ ٹاسک فورس اور آلیر پولیس اسٹیشن کی مشترکہ ٹیم نے انجام دی۔
گرفتار شدہ شخص کی شناخت کمپہ وجے (عمر 23، ضلع ملگ) کے طور پر ہوئی ہے، جبکہ اس کا ساتھی 17 سالہ نابالغ نوجوان ضلع جنگاؤں سے تعلق رکھتا ہے۔ دونوں بغیر نمبر پلیٹ والی چوری کی گئی ایک بُلِٹ اور ایک ایکٹیوا موٹر سائیکل پر سفر کر رہے تھے۔ تفتیش پر انہوں نے آلیر، جنگاؤں اور بھونگیر میں پچھلے 15 دنوں کے دوران متعدد بائیک چوری کی وارداتوں کا اعتراف کیا۔
ان کی نشاندہی پر پولیس نے جنگاؤں کے قریب جھاڑیوں میں چھپائی گئی دو مزید پلسر بائیکس بھی برآمد کیں۔ کمپہ وجے ایک عادی مجرم ہے، جس کا مجرمانہ ریکارڈ 2019 سے جاری ہے۔ اس پر پہلے بھی چوری اور ڈکیتی کے مقدمات درج ہیں، اور وہ پی ڈی ایکٹ کے تحت جیل جا چکا ہے۔ جون 2025 میں رہائی کے بعد اس نے دوبارہ نابالغ ساتھی کے ساتھ بائیک چوری کا سلسلہ شروع کیا۔
پولیس کے مطابق، وجے چوری شدہ گاڑیوں اور ان سے حاصل رقم کو جوئے اور شراب نوشی میں خرچ کرتا تھا۔ گزشتہ آٹھ سالوں کے دوران وہ تقریباً 50 لاکھروپئے کی املاک سے متعلق جرائم میں ملوث رہا ہے، جن میں ورنگل اور ہنمکنڈہ اضلاع کے مختلف تھانوں کی حدود شامل ہیں۔
آلیر پولیس نے اس مقدمے کو Cr No. 187/2025 (دفعہ 303(2) BNS) کے تحت درج کیا ہے، جبکہ اس نے جنگاؤں (Cr No. 377/2025) اور بھونگیر (Cr No. 293/2025) میں بھی اسی نوعیت کے جرائم کا اعتراف کیا ہے۔
یہ گرفتاری ڈی سی پی اکشَنش یادو، ایڈیشنل ڈی سی پی سی ایچ لکشمی نارائنا، اے سی پی -پی. سرینواس نائیڈو، اور ایس ایچ او ایم. کونڈل راؤ کی نگرانی میں انجام دی گئی۔ کمشنر پولیس جی. سدھیر بابو نے آلیر پولیس کی تیز رفتار کارروائی کی ستائش کی ہے۔
