حیدرآباد: تلنگانہ ہیومن رائٹس کمیشن نے گاندھی اسپتالGandhi Hospital کو 2014–15 کے دوران ایکسپائر ہیپاٹائٹس بی ویکسین لگوانے والے 6 مریضوں کو فی کس 1.25 لاکھ روپئے کا معاوضہ ادا کرنے کا حکم دیا ہے۔ کمیشن نے اس واقعے کو انسانی حقوق کی کھلی خلاف ورزی اور نظامِ نگرانی کی مکمل ناکامی قرار دیا۔
یہ فیصلہ ان مریضوں — اے این آدِلاکشمی، ایس دیوامنی، ٹی ستیش، پی ملیکرجن، ٹی روی اور جی دھننجئے — کی شکایتوں کے بعد سنایا گیا جنہیں ایکسپائر دوا دی گئی تھی اور جن پر اس کے منفی اثرات مرتب ہوئے تھے۔ کمیشن نے ان شکایات پر تحقیقات کا آغاز کیا اور جمعرات کو اپنا حتمی فیصلہ سنایا۔
ہیومن رائٹس کمیشن کے صدر جسٹس ڈاکٹر شمیم اختر نے اس واقعے کو ’’ادارہ جاتی ناکامی‘‘ قرار دیتے ہوئے کہا کہ ریاستی طبی نظام مریضوں کی حفاظت میں ناکام رہا۔ انہوں نے اسپتال کے سپرنٹنڈنٹ سمیت ذمہ دار افراد کے خلاف محکمانہ کارروائی کا حکم بھی دیا۔
کمیشن نے گاندھی اسپتال انتظامیہ کو ہدایت دی کہ وہ دو ماہ کے اندر دواؤں کے نظم و نسق سے متعلق سخت رہنما خطوط نافذ کرے تاکہ مستقبل میں اس قسم کی غفلت نہ دہرائی جائے۔ متعلقہ ڈاکٹر، جس نے ایکسپائر ویکسین دی تھی، کو معطل کر دیا گیا ہے۔
About the Author
