حیدرآباد: رنگا ریڈی [en]Ranga Reddy[/en] ضلع کے عبداللہ پور میٹ میں پیر کے روز اس وقت کشیدگی پیدا ہو گئی جب سب رجسٹرار آفس کی عمارت کے مالک نے مبینہ طور پر 38 ماہ کا کرایہ ادا نہ ہونے پر دفتر کو تالہ لگا دیا۔ یہ واقعہ اس وقت پیش آیا جب دفتر کا عملہ اور عوام رجسٹریشن کے کام کے لیے پہنچے تو دفتر بند پایا گیا۔
عمارت کے مالک نے بتایا کہ اس نے یہ عمارت 15 سال قبل کرائے پر دی تھی، لیکن گزشتہ 38 ماہ سے کرایہ نہیں ملا۔ اس نے دعویٰ کیا کہ وہ کئی مرتبہ ضلع حکام سے رجوع کر چکا ہے مگر کوئی جواب نہیں ملا، جس کے بعد مجبوراً دفتر کو بند کرنا پڑا۔
مالک نے کہا کہ وہ مزدور ہے اور اس پراپرٹی پر قرض ہے، جس کی ماہانہ قسطیں ادا کرنا مشکل ہو رہا ہے۔
انہوں نے سب رجسٹرار کو ایک تحریری نوٹس بھی دیا ہے جس میں 15 دن کے اندر بقایا کرایہ ادا کرنے اور چار ماہ کے اندر عمارت خالی کرنے کا مطالبہ کیا گیا ہے۔ بصورت دیگر قانونی کارروائی کی وارننگ دی گئی ہے۔
رنگاریڈی ضلع کے اس واقعہ نے رجسٹریشن کے عمل کو متاثر کیا اور عوامی کاموں میں رکاوٹ پیدا ہوئی۔
