حیدرآباد: نئے سال کی تقریبات کے آغاز سے چند گھنٹے قبل حیدرآباد پولیس نے شہر بھر میں ٹریفک سے متعلق سخت پابندیوں کا اعلان کیا ہے۔ یہ اقدامات عوامی تحفظ اور ٹریفک کے ہموار بہاؤ کو یقینی بنانے کے لیے کیے گئے ہیں۔ پابندیاں 31 دسمبر کی رات 10 بجے سے یکم جنوری کی صبح تک نافذ رہیں گی۔
ٹریفک کے جوائنٹ کمشنر (انچارج) وینکٹیشورلو کے مطابق ضرورت کے تحت بیگم پیٹ اور ٹولی چوکی فلائی اوور کے علاوہ شہر کے دیگر تمام فلائی اوورز بند کیے جا سکتے ہیں۔ انہوں نے شہریوں کو مشورہ دیا کہ وہ رات کے اوقات میں غیر ضروری سفر سے گریز کریں اور آؤٹر رنگ روڈ کا استعمال کریں۔
فلائی اوورز کی بندش | New Year Traffic
پولیس حکام نے بتایا کہ رات 11 بجے سے 2 بجے تک ٹینک بنڈ اور نیکلس روڈ پر بھی گاڑیوں کی آمد و رفت محدود رہے گی۔ اس دوران این ٹی آر مارگ، بڑے شاپنگ مالز اور تجارتی علاقوں میں خصوصی نگرانی رکھی جائے گی۔
حکام کے مطابق ان اقدامات کا مقصد جشن کے دوران کسی بھی ناخوشگوار واقعے سے بچاؤ ہے۔ پولیس اہلکار حساس مقامات پر مسلسل گشت کریں گے تاکہ ٹریفک نظم و ضبط برقرار رہے۔
شراب نوشی کے خلاف کارروائی | New Year Traffic
شہر بھر میں 217 اہم مقامات پر پولیس چیکنگ کی جائے گی۔ شراب نوشی کر کے گاڑی چلانے کے خلاف جانچ کا آغاز شام 8 بجے ہوگا اور یہ کارروائی پوری رات جاری رہے گی۔ پولیس نے لاپرواہ ڈرائیونگ اور ٹریفک قوانین کی خلاف ورزی پر سخت کارروائی کی وارننگ دی ہے۔
پولیس نے شہریوں سے اپیل کی ہے کہ وہ ذمہ داری کے ساتھ جشن منائیں اور عوامی سلامتی کو خطرے میں ڈالنے والے کسی بھی عمل سے باز رہیں۔ شراب کے زیر اثر افراد کو واضح ہدایت دی گئی ہے کہ وہ گاڑی نہ چلائیں۔
About the Author
