حیدرآباد: جسٹس سوریہ کانت نے راشٹرپتی بھون میں صدر دروپدی مرمو کے روبرو ہندوستان کے چیف جسٹس کے طور پر حلف اٹھایا۔ انہوں نے ہندی میں اور ’نیم آف گاڈ‘ سے حلف لیا، جس سے تقریب میں ایک نمایاں تبدیلی نظر آئی۔ یہ تقریب اعلیٰ سطح کے قومی اور بین الاقوامی مہمانوں کی موجودگی میں منعقد ہوئی۔
تقریب میں وزیر اعظم نریندر مودی، نائب صدر سی پی رادھا کرشنن، مرکزی وزرا، ہریانہ کے وزیر اعلیٰ نائیب سنگھ سینی اور تلنگانہ کے وزیر اعلیٰ ریونت ریڈی بھی موجود تھے۔ بھوٹان، کینیا، ملائیشیا، برازیل، ماریشس، نیپال اور سری لنکا سے عدالتی وفود نے بھی شرکت کی۔
جسٹس سوریہ کانت ملک کے 53ویں چیف جسٹس بنے ہیں۔ ان کی مدت کار 14 ماہ پر مشتمل ہوگی اور 9 فروری 2027 کو اختتام پذیر ہوگی۔ ان کی تقرری 30 اکتوبر کو اس وقت کے سی جے آئی جسٹس گوائی کی سفارش کے بعد عمل میں آئی۔
چار دہائیوں پر محیط قانونی سفر | CJI Oath
وزارت قانون و انصاف نے آئین کے آرٹیکل 124(2) کے تحت تقرری کا نوٹیفکیشن جاری کیا۔ جسٹس سوریہ کانت 10 فروری 1962 کو ہریانہ میں پیدا ہوئے۔ 1981 میں گورنمنٹ پی جی کالج حصار سے گریجویشن اور 1984 میں مہارشی دیانند یونیورسٹی سے ایل ایل بی کی ڈگری حاصل کی۔
اسی سال حصار میں وکالت کا آغاز کیا اور ایک سال بعد چندی گڑھ منتقل ہو کر پنجاب و ہریانہ ہائی کورٹ میں پیش ہونے لگے۔ انہوں نے آئینی، سروس اور دیوانی مقدمات کے علاوہ یونیورسٹیوں، بینکوں اور کارپوریشنز کے مقدمات میں بھی نمایاں کردار ادا کیا۔ جولائی 2000 میں وہ ہریانہ کے کم عمر ترین ایڈووکیٹ جنرل مقرر ہوئے، جبکہ مارچ 2001 میں سینئر ایڈووکیٹ کا درجہ ملا۔
9 جنوری 2004 کو وہ پنجاب و ہریانہ ہائی کورٹ کے مستقل جج بنے۔ اکتوبر 2018 میں وہ ہماچل پردیش ہائی کورٹ کے چیف جسٹس مقرر ہوئے، جہاں سے مئی 2019 میں سپریم کورٹ میں ترقی پائی۔
اعلیٰ عدلیہ میں متحرک کردار اور انتظامی تجربہ | CJI Oath
جسٹس سوریہ کانت 2007 تا 2011 نیشنل لیگل سروسز اتھارٹی کی گورننگ باڈی کے رکن رہے۔ وہ انڈین لا انسٹی ٹیوٹ کی مختلف کمیٹیوں میں بھی سرگرم رہے ہیں۔ نومبر 2024 سے وہ سپریم کورٹ لیگل سروسز کمیٹی کے چیئرمین تھے، جس سے ان کے انتظامی تجربے میں خاصی وسعت آئی۔
قانونی ماہرین کا کہنا ہے کہ عدالتوں میں ان کی اصولی سوچ، تجربہ اور نظم و ضبط عدالتی نظام کو مضبوط بنانے میں مدد دیں گے۔ نئی ذمہ داریوں کے ساتھ ان سے عدالتی اصلاحات اور انصاف کی رفتار بہتر بنانے کی توقع ہے۔
About the Author
