حیدرآباد: تلنگانہ کے چیف الیکٹورل آفیسر سی۔ سدرشن ریڈی نے جوبلی ہلز کے تمام ووٹروں سے اپیل کی ہے کہ وہ 11 نومبر کو ووٹ ڈالنے کے وقت لازمی طور پر فوٹو شناختی کارڈ (Photo ID) ساتھ لائیں۔
انہوں نے کہا کہ یہ ہدایت الیکشن کمیشن آف انڈیا کی جانب سے جاری کردہ رہنمائی کے مطابق ہے۔ ہر ووٹر کو پولنگ اسٹیشن پر ووٹ ڈالنے سے پہلے اپنا ای پی آئی سی (Elector’s Photo Identity Card) دکھانا ہوگا۔
12 شناختی دستاویزات ووٹ کے لیے قابلِ قبول | Voter ID Rules
چیف الیکٹورل آفیسر نے کہا کہ اگر کسی ووٹر کے پاس ای پی آئی سی نہیں ہے تو وہ درج ذیل 12 میں سے کوئی ایک دستاویز بطور شناخت پیش کر سکتا ہے:
- آدھار کارڈ
- ایم جی نریگا جاب کارڈ
- بینک یا پوسٹ آفس پاس بُک (فوٹو کے ساتھ)
- ہیلتھ انشورنس اسمارٹ کارڈ (آیوشمان بھارت سمیت)
- ڈرائیونگ لائسنس
- پین کارڈ
- نیشنل پاپولیشن رجسٹر کے تحت جاری اسمارٹ کارڈ
- انڈین پاسپورٹ
- پنشن دستاویز (فوٹو کے ساتھ)
- سرکاری ملازمین یا پبلک لمیٹڈ کمپنی کا آفس آئی ڈی
- ایم پی، ایم ایل اے یا ایم ایل سی کا سرکاری کارڈ
- محکمہ سماجی انصاف کی جانب سے جاری معذور افراد کا یو ڈی آئی ڈی کارڈ
انہوں نے مزید کہا کہ اوورسیز ووٹرز جنہیں ریپریزنٹیشن آف دی پیپل ایکٹ 1950 کی دفعہ 20A کے تحت رجسٹر کیا گیا ہے، انہیں اپنا اصل انڈین پاسپورٹ دکھانا ہوگا۔
ذمہ دارانہ ووٹنگ کی اپیل | Voter ID Rules
سدرشن ریڈی نے بتایا کہ ووٹر انفارمیشن سلپس پولنگ سے کم از کم پانچ دن پہلے تقسیم کر دی جائیں گی، تاہم یہ سلپس شناختی دستاویز کے طور پر قابلِ قبول نہیں ہوں گی۔
انہوں نے ووٹروں پر زور دیا کہ وہ پولنگ کے دن سے قبل اپنے نام الیکٹورل رول میں چیک کر لیں اور 11 نومبر کو ذمہ داری کے ساتھ ووٹ ڈالیں تاکہ جمہوری عمل مضبوط ہو۔
About the Author
