حیدرآباد: وزیر اعلیٰ ریونت ریڈی کی زیرِ صدارت جمعہ کو منعقد ہونے والا تلنگانہ کابینہ کا اجلاس ملتوی کر دیا گیا ہے۔ سکریٹریٹ کی جانب سے جاری سرکاری اعلامیے کے مطابق اب یہ اجلاس 12 نومبر دوپہر 3 بجے منعقد ہوگا۔
اجلاس کی تاخیر کی وجہ بلدیاتی انتخابات سے متعلق ہائی کورٹ کے حالیہ فیصلے کو قرار دیا گیا ہے، جس پر حکومت مزید غور کرنا چاہتی ہے۔
12 نومبر کے اجلاس میں اہم فیصلوں کا امکان | Cabinet Meeting
وزیر پونگو لیٹی سرینواس ریڈی نے کہا کہ کابینہ اجلاس میں ہائی کورٹ کے فیصلے پر تفصیلی تبادلۂ خیال کیا جائے گا اور بلدی انتخابات کے انعقاد پر حتمی فیصلہ متوقع ہے۔ حکومت عدالتی حکم کے اثرات کا جائزہ لینے کے بعد انتخابی شیڈول طے کرے گی۔
حال ہی میں ریاستی کابینہ نے تلنگانہ پنچایت راج ایکٹ 2018 کی شق 21(3) کو منسوخ کیا، جس کے تحت دو سے زیادہ بچوں والے امیدوار بلدی انتخابات میں حصہ نہیں لے سکتے تھے۔ گورنر سی پی رادھا کرشنن نے اس فیصلے کی منظوری دے دی، جس کے بعد محکمہ قانون نے سرکاری گزٹ نوٹیفکیشن جاری کر دیا۔
انتخابات اور انتظامی تیاریوں پر تبادلہ خیال متوقع | Cabinet Meeting
حکام کے مطابق 12 نومبر کو ہونے والا کابینہ اجلاس بلدی انتخابات کی انتظامی تیاریوں، عدالتی فیصلے کے اثرات اور دیگر گورننس امور پر مرکوز ہوگا۔
اجلاس میں مختلف محکموں کے سربراہان بھی شرکت کریں گے تاکہ انتخابی عمل میں شفافیت، نظم و ضبط اور مؤثر نفاذ کے لیے حکمتِ عملی طے کی جا سکے۔
