حیدرآباد: تلنگانہ میں بی جے پی نے 3 نومبر کو خانگی کالجوں کی جانب سے بلائے گئے ریاست گیر بند کی مکمل حمایت کا اعلان کیا ہے۔ کالج انتظامیہ نے کانگریس حکومت سے 900 کروڑ روپئے کے واجب الادا فیس ری ایمبرسمنٹ بقایاجات کی فوری ادائیگی کا مطالبہ کیا ہے۔
ریاستی بی جے پی صدر این۔ رامچندر راؤ نے خانگی کالج نمائندوں کے وفد سے ملاقات کی، جنہوں نے بتایا کہ چار سال سے بقایاجات ادا نہ ہونے کے باعث کئی ادارے مالی مشکلات کا شکار ہیں۔ ان کے مطابق تنخواہیں ادا نہ ہونے سے اساتذہ اور عملہ شدید دباؤ میں ہیں جبکہ کئی کالجوں کو روزمرہ امور چلانے میں دشواری پیش آ رہی ہے۔
کانگریس حکومت پر وعدہ خلافی کا الزام | Telangana College Bandh
بی جے پی صدر رامچندر راؤ نے حکومت پر الزام لگایا کہ اس نے بار بار یقین دہانی کے باوجود وعدہ پورا نہیں کیا۔ انہوں نے کہا، ’’اساتذہ اپنی ملازمتیں کھو رہے ہیں اور طلبہ کا تعلیمی سال ضائع ہونے کے خطرے میں ہے۔‘‘
انہوں نے وزیراعلیٰ اے۔ ریونت ریڈی، جو محکمہ تعلیم کے وزیر بھی ہیں، پر الزام لگایا کہ وہ تعلیمی شعبے کو نظر انداز کر رہے ہیں اور طلبہ کے مستقبل سے کھیل رہے ہیں۔
رامچندر راؤ نے یاد دلایا کہ حکومت نے دسہرہ اور دیوالی سے قبل فنڈز جاری کرنے کا وعدہ کیا تھا جس کے بعد کالجوں نے اپنی ہڑتال ملتوی کر دی تھی۔ انہوں نے کہا’’اب حکومت نے وہ وعدہ توڑ دیا، جس کے بعد کالجوں کے پاس احتجاج کے سوا کوئی راستہ نہیں بچا،‘‘۔
بی جے پی کی یقین دہانی، طلبہ و اساتذہ کے ساتھ اظہار یکجہتی | Telangana College Bandh
رامچندر راؤ نے اعلان کیا کہ بی جے پی اس احتجاجی تحریک میں خانگی کالجوں، اساتذہ اور طلبہ کے ساتھ کھڑی رہے گی۔ انہوں نے کہا کہ جب تک حکومت طلبہ، اساتذہ اور تعلیمی اداروں کے مطالبات پورے نہیں کرتی، بی جے پی اپنی جدوجہد جاری رکھے گی۔
3 نومبر کو ہونے والا بند ریاست بھر کے سینکڑوں خانگی کالجوں کی شرکت کے ساتھ بڑے پیمانے پر منایا جانے کی توقع ہے۔
About the Author
