حیدرآباد ۔ سابق وزیر اور سدی پیٹ کے رکن اسمبلی ٹی ہریش راؤ نے ہفتے کے روز وزیر اعلیٰ اے ریونت ریڈی کو ہدفِ تنقید بناتے ہوئے انہیں ’’Cutting Master‘‘ قرار دیا۔ یہ ریمارکس انہوں نے تلنگانہ بھون میں ’’کانگریس باقی کارڈ‘‘ کے اجراء کے موقع پر دیے۔
ہریش راؤ نے کہا کہ ریونت ریڈی انتخابات سے قبل فلمی اداکار رجنی کانت کی طرح بات کرتے تھے لیکن اقتدار میں آنے کے بعد ’’گجنی کانت‘‘ بن گئے۔ انہوں نے طنز کیا کہ وزیر اعلیٰ زیادہ تر انہی منصوبوں کی ربن کاٹنے کی تقریبات میں مصروف ہیں جو سابق حکومت نے شروع کیے تھے، جبکہ کے چندر شیکھر راؤ کی جانب سے چلائی گئی فلاحی اسکیموں کو کاٹنے میں بھی پیش پیش ہیں۔
عوامی مہم اور حکومت پر تنقید
سدی پیٹ کے ایم ایل اے نے کہا کہ بی آر ایس باقی کارڈ ہر گھر تک پہنچائے گی تاکہ عوام کو بتایا جا سکے کہ کانگریس نے وعدے پورے نہیں کیے۔ ان کے مطابق جب یہ کارڈ لوگوں تک پہنچیں گے تو وہ براہِ راست حکومت سے سوال کریں گے۔
ہریش راؤ نے کہا کہ نیپال، بنگلہ دیش اور سری لنکا میں عوامی احتجاج اس بات کی مثال ہے کہ ناکام حکومتوں کے خلاف لوگ کس طرح اٹھ کھڑے ہوتے ہیں۔ ان کے مطابق ریونت ریڈی کی حکومت بھی اسی سمت میں بڑھ رہی ہے۔
About the Author
