حیدرآباد: بھارت راشٹرا سمیتی کی ایم ایل سی اور تلنگانہ جاگرتی صدر K Kavithaنے اتوار کو الزام لگایا کہ ان کے والد اور سابق چیف منسٹر کے چندر شیکھر راؤ کی شبیہ ان کے قریبی ساتھیوں کی سرگرمیوں کی وجہ سے متاثر ہوئی ہے، جن میں سابق وزیر آبپاشی ٹی ہریش راؤ اور سابق رکن پارلیمنٹ سنتوش کمار شامل ہیں۔
پریس کانفرنس سے خطاب کرتے ہوئے کویتا نے دعویٰ کیا کہ ہریش راؤ اور سنتوش نے ان کے خلاف کئی بار سازش کی لیکن انہوں نے پارٹی کے مفاد میں خاموشی اختیار کی۔ ان کے مطابق کے چندر شیکھر راؤ نے تلنگانہ کے لیے انتھک محنت کی جبکہ بعض قریبی رہنما ذاتی مفاد کے پیچھے پڑے رہے۔ K Kavithaنے کہا کہ ان کے والد پر چند افراد کی بداعمالیوں کی وجہ سے ناحق الزامات لگائے جا رہے ہیں اور بطور بیٹی یہ ان کے لیے انتہائی تکلیف دہ ہے۔
سی بی آئی تحقیقات پر اعتراض اور پارٹی کی خاموشی
کویتا نے الزام لگایا کہ چیف منسٹر ریونت ریڈی نے ہریش راؤ اور سنتوش کمار کے ساتھ “الزام تراشی کے معاہدے” کے تحت ایسا ماحول بنایا ہے جس میں تنقید صرف کے چندر شیکھر راؤ تک محدود ہو گئی ہے۔ کالیشورم پراجیکٹ کے حوالے سے ان کا کہنا تھا کہ معمولی نقص کو بڑھا چڑھا کر پیش کیا جا رہا ہے۔ ان کے بقول اگر پراجیکٹ کا ایک چھوٹا سا حصہ بھی دھنس جائے تو ایسا تاثر دیا جاتا ہے جیسے پورا منصوبہ ناکام ہو گیا ہو۔
انہوں نے اعتراف کیا کہ یہ پہلا موقع ہے جب وہ کھل کر ان افراد کا نام لے رہی ہیں جنہوں نے کے چندر شیکھر راؤ اور پارٹی کو نقصان پہنچایا۔ کویتا نے کہا کہ اس صورتحال کی ذمہ داری ہریش راؤ اور سنتوش جیسے عناصر پر عائد ہوتی ہے اور اگر اس سے پارٹی کو آئندہ انتخابات میں نقصان بھی ہو تو وہ سچ بولتی رہیں گی۔
کویتا نے مزید کہا کہ اسمبلی میں کالیشورم پر بحث کے دوران پارٹی نے کے چندر شیکھر راؤ کا دفاع نہیں کیا اور نہ ہی ریاستی حکومت کی جانب سے سی بی آئی تحقیقات کے حکم کے بعد تلنگانہ بند کا اعلان کیا۔
انہوں نے جذباتی انداز میں کہا کہ ان کے والد ہمالیہ کی مانند ہیں اور ان پر بدعنوانی کے الزامات انتہائی تکلیف دہ ہیں۔ کویتا نے یاد دلایا کہ کے چندر شیکھر راؤ کو ان کی شادی کے دوران بھی مالی مشکلات کا سامنا تھا، اس لیے اگر ایسے والد پر سی بی آئی تحقیقات مسلط کی جائے تو بطور بیٹی ان کے لیے یہ ناقابل برداشت ہے۔
