حیدرآباد: قومی اسپورٹس ڈے کے موقع پر 29 اگست کو کھلاڑیوں اور کھیلوں سے دلچسپی رکھنے والوں کو حیدرآباد کے بولارم میں واقع Rashtrapati Nilayamمیں مفت داخلے کی اجازت دی جائے گی۔ حکام نے جمعہ کو اعلان کیا کہ یہ اقدام کھلاڑیوں کو خراجِ تحسین پیش کرنے اور اس تاریخی مقام کے ساتھ عوامی تعلق کو مزید فروغ دینے کے مقصد سے کیا گیا ہے۔
راشٹرپتی نیلائم کی افسر راجنی پریا نے کہا کہ کھلاڑیوں کو اپنی شناخت کے لیے حکومت کی جانب سے جاری کردہ کارڈ یا قومی و بین الاقوامی سطح پر کھیلوں میں شرکت کے سرٹیفکیٹس پیش کرنے ہوں گے۔ انہوں نے کہا کہ یہ خصوصی سہولت ملک کے لیے کھلاڑیوں کی خدمات کے اعتراف میں فراہم کی گئی ہے۔
یوم اساتذہ پر مفت داخلے کا اعلان
حکام نے مزید بتایا کہ 5 ستمبر یوم اساتذہ کے موقع پر اساتذہ اور ان کے اہلِ خانہ کو بھی راشٹرپتی نیلائم میں مفت داخلے کی اجازت ہوگی۔ اس فیصلے کا مقصد معاشرے کی تعمیر میں اساتذہ کے کلیدی کردار کو تسلیم کرنا اور انہیں اس صدارتی قیام گاہ کی ثقافتی و تاریخی اہمیت سے روشناس کروانا ہے۔
عوام کے لیے ایک موقع
انتظامیہ نے شہریوں پر زور دیا کہ وہ اس موقع سے بھرپور استفادہ کریں۔ حیدرآباد کے بولارم میں واقع راشٹرپتی نیلائم نہ صرف ایک قدیم تاریخی عمارت ہے بلکہ صدرِ جمہوریہ ہند کی تین سرکاری قیام گاہوں میں سے ایک بھی ہے۔ یہ عمارت ہندوستان کی سیاسی تاریخ کی جھلک پیش کرتی ہے اور اپنی شاندار طرزِ تعمیر کے باعث بھی منفرد مقام رکھتی ہے۔ زائرین یہاں نہ صرف عمارت کے وقار کو محسوس کر سکتے ہیں بلکہ خوبصورت باغات کی سیر اور نمائشوں کے ذریعے بھارت کی طرزِ حکمرانی کی تاریخ سے بھی واقف ہو سکتے ہیں۔
حکام نے کہا کہ کھلاڑیوں اور اساتذہ کو ان خاص دنوں پر مفت داخلے کی سہولت دینا نوجوانوں اور خاندانوں کو جمہوری اداروں اور قومی ورثے کے بارے میں آگاہی دلانے میں معاون ثابت ہوگا۔
About the Author
