حیدرآباد: تلنگانہ کی وزیر پنچایت راج اور خواتین و اطفال کی بہبود Seethakkaنے جمعرات کو کہا کہ حکومت کاماریڈی ضلع کے سیلاب متاثرہ خاندانوں کے ساتھ مکمل طور پر کھڑی ہے۔ وزیر، جو ضلع کی انچارج بھی ہیں، نے زیرآب کالونیوں کا دورہ کیا اور بدھ کی رات ہونے والی شدید بارش سے ہونے والے نقصانات کا جائزہ لیا۔
سیتکّا نے ہاؤسنگ بورڈ اور جی آر کالونی کا معائنہ کیا جہاں انہوں نے سیلابی پانی سے متاثرہ ایک پل کا بھی جائزہ لیا۔ انہوں نے ان گھروں کے مکینوں سے ملاقات کی جو پانی میں ڈوب گئے تھے، ان کے نقصانات کے بارے میں دریافت کیا اور اب بھی کالونیوں میں داخل ہو رہے پانی کی صورتحال کو دیکھا۔ وزیر نے شبیر علی فاؤنڈیشن کے ذریعہ متاثرہ خاندانوں میں کھانے کے پیکیٹ اور پھل تقسیم کیے۔
میڈیا سے بات کرتے ہوئے سیتکّا نے اس آفت کو غیر متوقع اور تکلیف دہ قرار دیا۔ انہوں نے کہا کہ آدھی رات سے شروع ہونے والی موسلادھار بارش نے صبح تک کاماریڈی اور ایلاریڈی حلقوں میں تباہی مچا دی۔ ابتدائی رپورٹ کے مطابق ایک ڈاکٹر سمیت تین ہلاکتوں کی تصدیق ہوئی ہے۔ انہوں نے کہا کہ چیف منسٹر ریونت ریڈی نے ان متاثرہ خاندانوں کو ہر ممکن مدد دینے کا وعدہ کیا ہے۔
وزیر نے کہا کہ اگرچہ جائیداد کا نقصان زیادہ دکھائی دے رہا ہے، لیکن کم جانی نقصان کسی حد تک اطمینان بخش ہے۔ انہوں نے عوام سے اپیل کی کہ وہ محتاط رہیں اور غیر ضروری طور پر گھروں سے باہر نہ نکلیں۔
سیتکّا نے کہا کہ حکومت مسلسل اجلاس منعقد کر رہی ہے تاکہ راحت اور بچاؤ کے اقدامات کو مربوط بنایا جا سکے۔ انہوں نے بتایا کہ گھروں، سڑکوں اور دیگر املاک کے نقصانات کا فوری تخمینہ لگایا جائے گا۔
ان کے ہمراہ حکومتی مشیر شبیر علی، ظہیرآباد کے رکن پارلیمان سریش شیٹکر، کاماریڈی ضلع کلکٹر آشیش سنگوان، ایس پی راجیش چندرہ اور دیگر سینئر عہدیدار موجود تھے۔
About the Author
