حیدرآباد: Telangana Assemblyکا اجلاس 30 اگست بروز ہفتہ سے شروع ہوگا جو 3 سے 5 دنوں تک جاری رہنے کی توقع ہے۔ حکام نے تصدیق کی کہ اجلاس کا ایجنڈا زیادہ تر کالیشورم پراجیکٹ رپورٹ اور پسماندہ طبقات کے لیے 42 فیصد ریزرویشن کے مسئلے پر مباحث پر مشتمل ہوگا۔ ان دونوں موضوعات پر حکمراں جماعت اور اپوزیشن کے درمیان سخت گرما گرمی متوقع ہے۔
شیڈول کے مطابق اجلاس کا سب سے اہم ایجنڈا کالیشورم پراجیکٹ کی انکوائری رپورٹ ہوگی۔ پی سی گھوش کمیشن نے میڈی گڈا بیراج کی ساختی خرابیوں پر 16 ماہ تک تحقیق کے بعد اپنی رپورٹ 31 جولائی کو حکومت کو پیش کی۔ رپورٹ میں کہا گیا کہ اعلیٰ عہدیداروں اور بی آر ایس کے چند سرکردہ قائدین تعمیر اور فیصلہ سازی میں سنگین کوتاہیوں کے ذمہ دار ہیں۔ ریاستی کابینہ پہلے ہی رپورٹ کا جائزہ لے چکی ہے اور چیف منسٹر ریونت ریڈی نے واضح کیا کہ اسمبلی میں رپورٹ پر مباحث کے بعد آئندہ اقدامات کا فیصلہ کیا جائے گا۔
اپوزیشن کی قیادت سینئر بی آر ایس لیڈر ٹی ہریش راؤ کر رہے ہیں جنہوں نے اعلان کیا ہے کہ وہ ایوان میں حکومت کو جوابدہ بنائیں گے۔ ان کا کہنا ہے کہ کالیشورم رپورٹ پر ہونے والا مباحث حالیہ برسوں کا سب سے شدید مباحث ہوگا۔ سابق چیف منسٹر کے چندر شیکھر راؤ کا نام بھی براہِ راست اس معاملے میں آیا ہے جس کے بعد یہ سوال شدت اختیار کر گیا ہے کہ آیا وہ اجلاس میں شریک ہو کر الزامات کا جواب دیں گے یا نہیں۔
اس کے علاوہ اجلاس میں بی سی ریزرویشن کے مسئلے پر بھی غور کیا جائے گا۔ حکومت نے پہلے ہی اسمبلی میں دو بل پاس کر کے اور ایک آرڈیننس جاری کر کے بلدیاتی انتخابات میں پسماندہ طبقات کو 42 فیصد ریزرویشن فراہم کیا ہے تاہم یہ بل مرکزی حکومت کے پاس زیر التوا ہیں اور ہائی کورٹ کی ڈیڈ لائن قریب ہے۔ حکام نے کہا کہ امکان ہے کہ اس اجلاس میں تعلیم اور ملازمتوں میں بھی 42 فیصد بی سی ریزرویشن فراہم کرنے کے لیے نیا بل پیش کیا جائے۔
سیاسی مبصرین کے مطابق چونکہ کالیشورم رپورٹ اور بی سی ریزرویشن دونوں ایجنڈے میں شامل ہیں، اس لیے تلنگانہ اسمبلی اجلاس انتہائی پرجوش اور سیاسی اعتبار سے نہایت اہم ثابت ہوگا جس میں حکمراں جماعت اور اپوزیشن دونوں بھرپور تیاری کے ساتھ شرکت کریں گے۔
About the Author
