حیدرآباد: نرمل کلکٹر ابھیلاش ابھینو نے بدھ کی شام سورنا پراجیکٹ کا معائنہ کرتے ہوئے تمام متعلقہ محکموں کو پیشگی اقدامات کی ہدایت دی۔ یہ دورہ اس وقت کیا گیا جب شام تقریباً 6 بجے عہدیداروں نے سیلابی پانی کی سطح میں اضافہ کی اطلاع دی۔
چوکس رہنے اور فوری اقدامات کی ہدایت
کلکٹر نے میڈیا سے بات کرتے ہوئے کہا کہ پانی کے بہاؤ کی وجہ سے کسی بھی مقامی باشندے کو دشواری نہیں ہونی چاہئے۔ انہوں نے محکمہ ریونیو، آبپاشی، بلدیہ، پنچایت راج اور محکمہ صحت کو ہدایت دی کہ وہ چوکس رہیں اور فوری اقدامات کریں۔
کلکٹر نے زور دیا کہ ضلع بھر میں پیشگی تیاری یقینی بنائی جائے اور سیلابی خطرہ بڑھنے کی صورت میں تاخیر کئے بغیر کارروائی کی جائے۔
اسکولوں کو تعطیلات کا اعلان
بعد ازاں احتیاطی تدبیر کے طور پر انہوں نے جمعرات کو ضلع کے تمام سرکاری و خانگی تعلیمی اداروں میں تعطیل Nirmal School Holidayکا اعلان کیا۔ یہ فیصلہ محکمہ موسمیات کی اطلاعات کی روشنی میں طلبہ کے تحفظ کے لئے کیا گیا۔
