حیدرآباد: شہر میں منگل کی شب سے شروع ہونے والی مسلسل بارش بدھ کی صبح تک جاری رہی جس سے کئی علاقے پانی میں ڈوب گئے اور شہریوں کو شدید مشکلات کا سامنا کرنا پڑا۔ انڈیا میٹرولوجیکل ڈپارٹمنٹ (آئی ایم ڈی) نے آرینج الرٹ جاری کرتے ہوئے مزید Hyderabad Rain کے ساتھ طوفانی ہواؤں اور بجلی چمکنے کی پیش گوئی کی ہے۔
شہر کے نشیبی علاقوں میاں پور، کوکٹ پلی، ایل بی نگر اور پرانے شہر کے حصوں میں پانی بھر گیا۔ اہم شاہراہوں پر ٹریفک رینگنے لگی۔ وِنائک چوتھی کے موقع پر مورتیاں اور پوجا سامان فروخت کرنے والے دکانداروں کا سامان بھی بارش سے خراب ہوگیا۔
تلنگانہ کے 16 اضلاع میں بھی اورنج الرٹ
آئی ایم ڈی حیدرآباد کی ڈائریکٹر ڈاکٹر نگارتنا نے عوام کو مشورہ دیا کہ صرف اشد ضرورت پر ہی گھروں سے نکلیں۔ انہوں نے بتایا کہ خلیج بنگال پر بننے والے لو پریشر ایریا کی وجہ سے یہ وسیع پیمانے پر بارش ہوئی ہے۔
محکمہ موسمیات نے 16 اضلاع کیلئے اورنج الرٹ جاری کیا ہے جن میں ہنمکنڈہ، ورنگل، بھدراچلم، کھمم، محبوب آباد، منچریال، پداپلی، آصف آباد، مُلُوگ، راجنا سرسلہ، جنگاؤں، میدک، ونپرتھی، کاماریڈی، نرمَل اور نارائن پیٹ شامل ہیں۔ ان علاقوں میں شدید سے انتہائی شدید بارش کے ساتھ آندھی اور بجلی گرنے کا امکان ہے۔
مسلسل بارش کے باعث دریا، نالے اور چشمے ابل پڑے ہیں اور کئی دیہات زیرِ آب آگئے ہیں۔ حکام نے کسانوں، چرواہوں اور دیہاتیوں کو وارننگ دی ہے کہ وہ نالوں اور بہتے ہوئے پانی سے دور رہیں اور کسی بھی صورت میں اُبلتے ہوئے ندی نالوں کو عبور نہ کریں۔
ڈاکٹر ناگرتنا نے کہا کہ بدھ تک شدید بارش جاری رہنے کا امکان ہے جبکہ آئندہ دو دن ہلکی سے درمیانی بارش ریاست بھر میں ہوگی۔ ضلعی انتظامیہ کو ہائی الرٹ پر رکھا گیا ہے تاکہ نشیبی علاقوں میں حفاظتی اقدامات کئے جا سکیں، خصوصاً وِنائک چوتھی کے موقع پر عوامی حفاظت کو یقینی بنایا جائے۔
About the Author
