حیدرآباد: چیف منسٹر اے ریونت ریڈی اور ڈپٹی چیف منسٹر مالو بھٹی وکرمار کا پیر کے روز دہلی روانہ ہوئے تاکہ تلنگانہ میں عنقریب ہونے والے مقامی ادارہ جات کے انتخابات کے سلسلے میں سینئر قانونی ماہرین سے مشاورت کرسکیں۔ ان کی توجہ پسماندہ طبقات BC Reservation اور دیگر دستوری رکاوٹوں کو دور کرنے پر مرکوز ہے۔
تلنگانہ ہائی کورٹ نے ریاستی حکومت کو ہدایت دی ہے کہ وہ 30 ستمبر تک انتخابی عمل مکمل کرے، جس کے باعث حکومت کی قانونی تیاریوں میں تیزی آئی ہے۔ ذرائع نے تصدیق کی کہ چیف منسٹر اور ڈپٹی چیف منسٹر دہلی میں سپریم کورٹ کے ممتاز وکلاء سے ملاقات کر رہے ہیں تاکہ عدالت کی مقررہ مدت سے قبل اپنی قانونی حکمت عملی تیار کی جا سکے۔
مرکزی تنازعہ حکومت کی اس تجویز سے جڑا ہے جس کے تحت مقامی ادارہ جات کی 42 فیصد نشستیں بی سی طبقات کے لیے مختص کی جائیں گی۔ اگرچہ تلنگانہ اسمبلی اس بل کو منظور کر چکی ہے لیکن صدر جمہوریہ نے اب تک اس کی منظوری نہیں دی۔ اسی دوران اس ریزرویشن منصوبے سے منسلک آرڈیننس بھی گورنر کی منظوری کا منتظر ہے۔
ان تاخیرات کی وجہ سے غیر یقینی صورتحال پیدا ہوگئی ہے۔ قانونی ماہرین نے انتباہ دیا ہے کہ اگر ریزرویشن کے مسئلے کو حل کئے بغیر انتخابات کرائے گئے تو نئے مقدمات کا سامنا کرنا پڑ سکتا ہے۔
ذرائع کے مطابق ریونت ریڈی اس موقع پر پارٹی بدلنے والے ارکان اسمبلی کے مسئلے پر بھی بات چیت کرنے والے ہیں، جو پہلے ہی ریاست میں سیاسی کشیدگی کو بڑھا رہا ہے۔
قانونی مشاورت مکمل کرنے کے بعد ریونت اور بھٹی 27 اگست کو بہار روانہ ہوں گے جہاں وہ کانگریس لیڈر راہل گاندھی کی پدیاترا میں شامل ہوں گے۔ توقع ہے کہ تلنگانہ کے کئی وزراء بھی اس موقع پر شریک ہوں گے۔
ہائی کورٹ کی مقررہ مدت قریب آنے کے ساتھ ہی آئندہ چند ہفتے ریاستی انتخابی حکمت عملی کے لیے نہایت اہم سمجھے جا رہے ہیں۔
