حیدرآباد: ٹالی ووڈ فلم انڈسٹری میں دو ہفتوں سے جاری Tollywood Strikeکا خاتمہ وزیر اعلیٰ تلنگانہ ریونت ریڈی کی مداخلت کے بعد ممکن ہوا۔ اس ہڑتال کی وجہ سے ریاست بھر میں فلموں کی شوٹنگ رکی ہوئی تھی اور کئی فلموں کی ریلیز بھی ملتوی کر دی گئی تھی۔
پروڈیوسرس، یونینز اور انڈسٹری کے نمائندوں کے درمیان کئی دور کی بات چیت کے باوجود معاہدہ نہ ہوسکا تھا۔ تاہم، سی ایم ریونت ریڈی نے ریاستی نمائندوں کو مداخلت کی ہدایت دی جس کے بعد ہڑتالی کارکنوں نے اپنا احتجاج واپس لے لیا۔
تلگو فلم پروڈیوسرس کونسل کے ارکان کی وزیراعلیٰ سے ملاقات
اتوار کے روز تلگو فلم پروڈیوسرس کونسل کے اراکین اور انڈسٹری کی سرکردہ شخصیات نے چیف منسٹر سے ان کی رہائش گاہ جوبلی ہلز میں ملاقات کی اور ان کا شکریہ ادا کیا۔ ریونت ریڈی نے یقین دہانی کرائی کہ حکومت فلم انڈسٹری کی ترقی کے لیے ہر ممکن تعاون فراہم کرے گی۔
انہوں نے فلم انڈسٹری کے معاملات پر نظر رکھنے اور تنازعات کو مستقل طور پر ختم کرنے کے لیے ایک خصوصی میکنزم تشکیل دینے کی تجویز پیش کی۔ چیف منسٹر نے پروڈیوسرس، کارکنوں اور حکومت کے درمیان مشترکہ پالیسی اپنانے پر زور دیا تاکہ مستقبل میں ہڑتال جیسے حالات پیدا نہ ہوں۔
اس موقع پر تلنگانہ فلم ڈیولپمنٹ کارپوریشن کے چیئرمین دِل راجو، پروڈیوسرس الّو اروند، ڈی سُریش بابو، جیمینی کرن، شراونتی روی کشور، نوین ارنینی، وامسی، باپینیدو، ڈی وی وی دانیا، چروکوری سدھاکر، ابھیشیک اگروال، وِشوا پرساد، انیل سنکارا، شرتھ مارر، این وی پرساد اور نامور ہدایتکار تری وکرم سرینواس، بویاپاٹی سرینو، سندیپ ریڈی وانگا، وامشی پائیدی پلی، انیل روی پوڈی اور وینکی کوڈومولا موجود تھے۔
About the Author
