حیدرآباد: حیدرآباد ڈیزاسٹر ریسپانس اینڈ ایسیٹ پروٹیکشن ایجنسی (HYDRAA) نے جمعرات کو مادھا پور کے Jubilee Enclaveمیں غیرقانونی ڈھانچوں کو منہدم کرتے ہوئے قبضے ختم کرائے اور 16,000 مربع گز اراضی واگزار کرائی جس کی مالیت تقریباً 400 کروڑ روپئے بتائی جا رہی ہے۔
عہدیداروں کے مطابق صاف کی گئی اراضی میں 8,500 گز پر مشتمل دو پارک، 5,000 گز کی سڑک اور 300 گز سرکاری زمین شامل تھی، جہاں ایک غیرقانونی ہوٹل تعمیر کیا گیا تھا۔ یہ لے آؤٹ 1995 میں 22.20 ایکڑ اور تقریباً 100 پلاٹس کے ساتھ منظور ہوا تھا، جن میں چار پارکس مختص تھے لیکن ان میں سے دو پر قبضہ پایا گیا۔
جوبلی اینکلیو میں تجاوزات ہٹائے گئے
یہ کارروائی کمشنر اے وی رنگاناتھ کے احکامات پر کی گئی اور اے سی پی سری کانت، انسپکٹرز راج شیکھر اور بالا گوپال نے نگرانی کی۔ انہدام کے بعد سرکاری اراضی پر بورڈز اور فینسنگ لگائی گئی تاکہ دوبارہ قبضہ نہ ہو سکے۔ ذمہ دار افراد کے خلاف پولیس میں مقدمات درج کر لیے گئے ہیں۔
شکایات کے مطابق جے ہند ریڈی نامی شخص نے عوامی اراضی پر ہوٹل تعمیر کر کے قبضہ کیا تھا اور کرایہ اور تشہیر سے آمدنی حاصل کر رہا تھا۔ اس ہوٹل کے خلاف جی ایچ ایم سی نے پہلے ہی نوٹس جاری کیا تھا۔
مقامی نمائندوں نے ہائیڈرا کی کارروائی پر شکریہ ادا کرتے ہوئے کہا کہ انکلیو کے کثیر آبادی والے آئی ٹی کوریڈور میں عوامی استعمال کے لیے مخصوص پارکوں کو بحال کیا گیا ہے۔ انہوں نے چیف منسٹر ریونت ریڈی اور کمشنر رنگاناتھ کی جانب سے تجاوزات کے خلاف سخت اقدامات کی ستائش کی۔
About the Author
