حیدرآباد: سینئر کانگریس لیڈر اور سرکاری مشیر محمد Shabbir Aliنے سابق وزیراعلیٰ کے چندر شیکھر راؤ پر سخت حملہ کرتے ہوئے الزام عائد کیا کہ وہ کالیشورم منصوبے میں اپنی ناکامیوں کو چھپانے کی کوشش کر رہے ہیں۔ گاندھی بھون میں پراجاوانی عوامی رابطہ پروگرام کے بعد میڈیا سے بات کرتے ہوئے انہوں نے کہا کہ کے سی آر نے جسٹس پی سی گھوش کمیشن کی رپورٹ اسمبلی میں بحث کے لیے پیش ہونے سے پہلے ہی عدالت کا رخ کیا۔
محمد علی شبیر نے کہا کہ جسٹس گھوش نے 15 ماہ تک کالیشورم منصوبے کی تحقیقات کیں، سیاست دانوں، انجینئروں، اعلیٰ عہدیداروں اور مرکزی ایجنسیوں سے سوالات کیے اور نتیجہ اخذ کیا کہ متعدد خلاف ورزیاں ہوئیں۔ ان کے مطابق اس منصوبے کو نہ تو کابینہ کی منظوری ملی، نہ ہی سنٹرل واٹر کمیشن کی اجازت اور نہ ہی نیشنل ڈیم سیفٹی اتھارٹی کا کلیرنس۔ انہوں نے الزام عائد کیا کہ کے سی آر نے اپنے “فرمان” پر یہ منصوبہ چلایا اور عوام کے 1.10 لاکھ کروڑ روپئے ضائع کر دیے۔ ان کے مطابق نظام دور میں بھی ایسی cبدانتظامی کبھی نہیں ہوئی۔
انہوں نے بتایا کہ یہ رپورٹ جلد اسمبلی میں پیش کی جائے گی اور ایک بار بحث شروع ہونے کے بعد کے سی آر کو اس کے نتائج بھگتنا ہوں گے۔ ان کا کہنا تھا کہ کانگریس حکومت کسی کو بھی بخشے گی نہیں۔
سماجی انصاف کے موضوع پر بات کرتے ہوئے شبیر علی نے کہا کہ تلنگانہ گزشتہ 100 برسوں میں پہلی ریاست ہے جس نے ذات پات کی مردم شماری کرائی اور اس میں بتایا گیا کہ بی سی طبقات آبادی کا 46.25 فیصد ہیں۔ انہوں نے کہا کہ یہ راہول گاندھی کا نظریہ تھا جسے وزیراعلیٰ ریونت ریڈی نے ہمت کے ساتھ نافذ کیا اور اب دیگر ریاستیں بھی تلنگانہ کی تقلید کرنا چاہتی ہیں۔
انہوں نے کہا کہ ریاستی اسمبلی نے بی سی طبقات کے لیے ریزرویشن 42 فیصد کرنے کا قانون منظور کیا تھا لیکن مرکز نے اس میں مسلمانوں کی شمولیت پر روک لگا دی۔ 4 فیصد مسلم ریزرویشن کے بارے میں وضاحت کرتے ہوئے انہوں نے کہا کہ یہ مذہبی نہیں بلکہ پیشہ ورانہ اور سماجی پسماندگی کی بنیاد پر ہے۔ انہوں نے یاد دلایا کہ آزادی سے پہلے بھی مسلمانوں کو تعلیم اور ملازمتوں میں ریزرویشن حاصل رہا ہے اور ڈاکٹر وائی ایس راج شیکھر ریڈی نے 2004 میں اسے متعارف کرایا جس سے لاکھوں خاندانوں کو فائدہ ہوا۔
انہوں نے کہا کہ ذات پات مردم شماری میں 10.08 فیصد مسلمان بی سی طبقات میں آتے ہیں اور ہنٹر کمیشن سے لے کر منڈل کمیشن تک سب نے مسلمانوں کی پسماندہ حیثیت کو تسلیم کیا۔ انہوں نے طنز کیا کہ اگر بی جے پی میں ہمت ہے تو پہلے گجرات یا دیگر بی جے پی ریاستوں سے مسلم ریزرویشن ختم کرے، صرف تلنگانہ کو کیوں نشانہ بنایا جا رہا ہے۔
ایس سی طبقات کی درجہ بندی پر انہوں نے کہا کہ کانگریس نے آخر کار 6 دہائیوں کے مطالبے کے بعد مادیگا برادری کو انصاف دلایا۔ انہوں نے کہا کہ سپریم کورٹ کے 2024 کے فیصلے کے بعد تلنگانہ پہلی ریاست بنی جس نے ایس سی ریزرویشن کو تین حصوں میں تقسیم کیا اور یہ صرف راہول گاندھی کے وژن کی بدولت ممکن ہوا۔
انہوں نے وزیراعلیٰ ریونت ریڈی کی اس تجویز کی بھی حمایت کی کہ جسٹس سدرشن ریڈی کو نائب صدر بنایا جائے۔ شبیر نے کہا کہ سابق جج نے اقلیتوں کے ریزرویشن کو برقرار رکھا اور دیانت داری سے زندگی گزاری۔ انہوں نے کہا کہ بی جے پی نے اتفاق رائے کی بات کی لیکن سب سے پہلے اپنا امیدوار نامزد کردیا، جس پر انڈیا بلاک نے تلنگانہ کے فرزند سدرشن ریڈی کا نام پیش کیا۔
بی جے پی پر تنقید کرتے ہوئے انہوں نے الزام عائد کیا کہ مرکز نئے قوانین کا سہارا لے کر اپوزیشن قائدین کو جیل بھیج رہا ہے۔ اندرماں ہاؤسنگ اسکیم کا جائزہ لیتے ہوئے انہوں نے کہا کہ دو مرحلوں میں مکانات فراہم کیے جائیں گے، پہلے ان کو جن کے پاس زمین ہے اور پھر بے زمین خاندانوں کو۔
اس سے قبل پراجاوانی پروگرام کے دوران انہوں نے عوامی شکایات سنیں اور بعض معاملات میں فوراً متعلقہ عہدیداروں کو فون کر کے کارروائی کی ہدایت دی۔ انہوں نے کہا کہ دسمبر 2023 کے بعد کانگریس نے شکایات کے ازالے کا نظام بحال کیا، جبکہ بی آر ایس دور میں عوام کے پاس کوئی فورم نہیں تھا۔ اب ان کی آواز سنی جا رہی ہے۔
