حیدرآباد: شہر میں دو دن کے اندر مذہبی جلوسوں کے دوران Electrocution کے دو الگ الگ حادثات میں سات افراد ہلاک ہوگئے۔ تازہ واقعہ پیر کی شب بندلہ گوڑہ میں پیش آیا جب دو نوجوان گنیش مورتی لے جاتے ہوئے ہلاک ہوگئے۔
پولیس کے مطابق نوجوان ایک بڑے گنیش مورتی کو ٹریکٹر پر منتقل کر رہے تھے کہ اچانک وہ ہائی ٹینشن تار سے ٹکرا گیا۔ کرنٹ پورے ٹریکٹر میں پھیل گیا جس کے نتیجے میں ٹونی (21) اور وکاس (20) موقع پر ہی ہلاک ہوگئے۔ ایک اور نوجوان، اکھل، شدید زخمی ہوا اور اسپتال منتقل کیا گیا۔ حادثے کے دوران ٹریکٹر کے ٹائر جل گئے، جبکہ مورتی کو بعد میں کرین کے ذریعے ہٹایا گیا۔ پولیس نے مقدمہ درج کرلیا ہے اور تحقیقات جاری ہیں۔
رامنتاپور میں 5 ہلاکتیں
اس سے ایک روز قبل اتوار کی شب رامنتاپور کے گوکھلے نگر میں سری کرشنا جنم اشٹمی جلوس کے دوران اسی طرح کا حادثہ پیش آیا۔ بارش کے باوجود جلوس میں خصوصی رتھ نکالا گیا تھا۔ یداوا سنگھم بلڈنگ کے قریب جیپ خراب ہوگئی جس کے بعد عقیدتمندوں نے رتھ کو دھکیلنا شروع کیا۔ اچانک رتھ اوور ہیڈ تار سے ٹکرا گیا اور پیچھے سے دھکیلنے والے فوراً گر پڑے۔
اس واقعے میں پانچ افراد موقع پر ہلاک ہوگئے جبکہ چار افراد شدید زخمی ہوکر اسپتال منتقل ہوئے۔ عینی شاہدین کے مطابق مقامی لوگوں نے زخمیوں کو سی پی آر دینے کی کوشش کی لیکن کامیابی نہ ملی۔ پولیس نے مقدمہ درج کرکے مزید تحقیقات شروع کردی ہیں۔
About the Author
