Hyderabad: Central Crime Station (CCS) police ne Ambika Steel ke managing partner ko ek bade GST fraud case mein giraftar kar liya. Yeh karwai state GST officers ki shikayat par ki gayi.
Fake invoices aur e-way bills ka istemal
Tahqiqat mein samne aaya ke milzam ne asal saman ke baghair e-way bills banaye. Usne jali invoices issue kiye aur illegal input tax credit hasil kiya. Yeh amal GST qawaneen ki sangin khilaf warzi hai.
Seized gaari ka ghalat istemal
Officials ne bataya ke 30 July 2025 ko case register hua tha. Investigation mein yeh bhi samne aaya ke ek gaari (AP29TA7213) jo June 2025 mein department ne seize ki thi, uska misuse hua. Kai taxpayers ne isi gaari ke details ka istemal kar ke fake invoices banaye. Haqeeqat mein koi saman transport nahi hua.
Court ki karwai aur arrest
FIR ke baad milzam ne High Court se case cancel karne ki darkhwast di. Lekin court ne uski arzi mustarid kar di. Uske baad jab woh Goa farar hone ki koshish kar raha tha to police ne use giraftar kar liya.
Mazeed mulzim farar
Police ke mutabiq is case mein aur bhi mulzim shamil hain. Kuch abhi tak farar hain aur unki talash jari hai. Tahqiqat abhi bhi jaari hai.
